ბიძინა ივანიშვილისთვის ახალი მტრის ხატი არის კვირიკაშვილი - ტროცკის მსგავს ფიგურად უნდა წარმოაჩინოს. ბახტაძემ კი რაც არ უნდა გააკეთოს, იცის, რომ ერთ წელიწადში მას ისევე გააპანღურებენ, როგორც მისი ორი წინამორბედი გააპანღურეს, განუცხადა „რუსთავი 2“-ის გადაცემა „პოსტ-სკრიპტუმს“ „ევროპული საქართველოს“ ერთ-ერთმა ლიდერმა, გიგი უგულავამ ბიძინა ივანიშვილის სატელევიზიო ინტერვიუს შეფასებისას.

„თითქოს გრენლანდია აღმოაჩინა და 6 წლის თავზე გვეუბნება, რომ სიღარიბემ იმატა, იმის მაგივრად რომ სიღარიბეს ეკლო და როცა ამას ამბობს, რომ რამდენიმე დღე ცუდ ხასიათზე ვიყავი, ნუ შემაშფოთებელიც აღარ არის, გამაოგნებელი არის ეს, იმიტომ რომ ამ განცხადების მერე ადამიანი იმას კი არ უნდა ამბობდეს, რომ კიდევ 12 წელი და 13 წელი მაცადეთ. ამ განცხადების მერე უნდა მიდიოდეს სახლში...

„ახალი გაკულაკების მცდელობა იყო და ახალი მტრის ხატის შექმნა. აი, როგორც ივანიშვილს უყვარს ორველის „ცხოველთა ფერმა“, ფერმერი ჯონსი აღარ მუშაობს, ასე ვთქვათ, მისი მტრის ხატი, როგორც აქამდე ექსპლუტაციას უწევდა ჩვენ და მიშას და ყველა სხვა დანარჩენს და ახლა ახალი მტრის ხატი უნდა შეიქმნას და ეს ახალი მტრის ხატი არის კვირიკაშვილი - ტროცკის მსგავს ფიგურად უნდა წარმოაჩინოს, სისულელეა იმიტომ, რომ კვირიკაშვილი პოლიტიკოსი რომ ყოფილიყო, ასე არ წავიდოდა. ანუ რაც არ უნდა გააკეთოს ბახტაძემ, ბახტაძემ იცის, რომ ერთ წელიწადში მას ისევე გააპანღურებენ, როგორც მისი ორი წინამორბედი იყო“, განაცხადა გიგი უგულავამ.