საქართველოს ყოფილი პრეზიდენტი მიხეილ სააკაშვილი აცხადებს, რომ პაატა ბურჭულაძე - რომელიც პოლიტიკური გაერთიანების, „ძალა ერთობაშია“ გვერდით დგას და მის საერთო საპრეზიდენტო კანდიდატს, გრიგოლ ვაშაძეს უჭერს მხარს - განსხვავებით ივანიშვილისაგან ნამდვილი ქველმოქმედია, ხოლო „იმ აფერისტმა გამოაცხადა ქურდად, ბანდიტად, ყაჩაღად, ბავშვებს პარავდაო“.

„პაატა არის ძალიან დიდი ხელოვანი, ეს არის ნამდვილად ეროვნული სიამაყე. პაატა ბურჭულაძემაც დაუშვა პოლიტიკური შეცდომები, ის არ არის პოლიტიკოსი, მაგრამ ნამდვილად ძაან მაგარ რაღაცას აკეთებდა თავის საქველმოქმედო ფონდში და განსხვავებით ივანიშვილისაგან ნამდვილი ქველმოქმედია. იმ აფერისტმა გამოაცხადა ქურდად, ბანდიტად, ყაჩაღად, ბავშვებს პარავდაო. მე ხომ ვიცი რა მოკრძალებულად ცხოვრობს პაატა. სრული სისულელე. ყველაფერი რაც ჰქონდა ამ ფონდს, მისცა და ამის სანაცვლოდ რა მიიღო მადლობის მაგივრად? შეურაცხყოფა, ცილისწამება და ყველაფრის უკუღმა გამოხატვა. ამიტომ მას აქვს თავისი მოტივაცია, რატომ არის აქ. და მისი ყველაზე მთავარი მოტივაცია არის ის, რომ ჩვენ ყველანი ვკარგავთ სამშობლოს“, განაცხადა მიხეილ სააკაშვილმა გადაცემა „არჩევანში“.