საქართველოს ყოფილი პრეზიდენტი მიხეილ სააკაშვილი აცხადებს, რომ „იმ წამიდან, როდესაც ქართველი ხალხი უარს ეტყვის ივანიშვილს, მისი საქმე დამთავრებულია“.

„როგორც ზღაპრებშია, წყვდიადი რომ გაიბნევა და მზე ამოვა, ზუსტად ასე იქნება ვაშაძის გაპრეზიდენტებისას. ეგრევე მზე ამოვა და მთელი წყვდიადის ჯოჯოები აორთქლდებიან. მთელი ეს ჭაობი უცებ დაშრება და, პირველ რიგში, საქართველო შეწყვეტს ნგრევას. ეს ძალიან მნიშვნელოვანია, ჩვენ ქვეყნის ნგრევას შევაჩერებთ. ეს ახლა მთავარი ამოცანაა. რაც არ უნდა ოქროს ბაღებს დაგპირდეთ ვიღაც, ეს იქნება ტყუილი. ვინაიდან, ამ საპრეზიდენტო არჩევნების პირველი ამოცანა, ქვეყნის განადგურების შეჩერებაა. ჩვენ ვკარგავთ საქართველოს, ჩვენ ვკარგავთ ჩვენს ქვეყანას. მე არ შემიძლია, გული მიკვდება, როდესაც ვუყურებ, ის ყველაფერი, რაც თქვენთან ერთად რუდუნებით ვაშენეთ და მთელ მსოფლიოში წლების მანძილზე რითაც ვამაყობდით და რითაც გვიცნობდა და გვაქებდა ყველა, როგორ ჩამოშალა ეს ყველაფერი ამ ურჩხულმა. ის მიადგა და ურტყა ურო, ჩაქუჩი, ყველაფერი და ბოლოს, რეალურად, ჩამოშლის პირას მიიყვანა. პირველი ამოცანა ამის შეჩერებაა“, განაცხადა მიხეილ სააკაშვილმა გადაცემა „არჩევანში“.