ახალქალაქის მუნიციპალიტეტში 2018 წლის განმავლობაში რეგიონული განვითარებისა ფონდისა და ადგილობრივი ბიუჯეტის დაფინანსებით მნიშვნელოვანი ინფრასტრუქტურული პროექტების განხორციელება იგეგმება. აღიშნული განცხადება GUARDIAN.GE-სთან საუბრისას ახალქალაქის მერმა, იურიკ უნანიანმა გააკეთა.

როგორც უნანიანი ამბობს, რეგიონული განვითარების ფონდი მიმდინარე წელს მუნიციპალიტეტის მასშტაბით განსახორციელებელ პროექტებზე, დაახლოებით, 2 600 000 ლარს, ხოლო ადგილობრივი ბიუჯეტი, დაახლოებით, 2 200 000 ლარს დახარჯავს.

„ქალაქ ახალქალაქში ამ ეტაპზე ოთხი ქუჩის მოასფალტება მიმდინარეობს. პროექტი რეგიონული განვითარების ფონდის მიერ გამოყოფილი ფინანსებით სრულდება. უახლოეს დღეებში დაიწყება გზების მოასფალტება სოფელ ბარალეთიდან იხტილის მიმართულებით და ასევე ბარალეთიდან კოჭიოს მიმართულებით. ამჟამად ეს პროექტები დატენდერებულია და მუშაობა დაიწყება უახლოეს პერიოდში. აღიშნულ სამუშაოებზე ადგილობრივი ბიუჯეტის თანხები დაიხარჯება.

სოფელ სულდაში, ბარალეთსა და აზავრეთში საბავშვო ბაღების სარემონტო სამუშაოები ხორციელდება. აღნიშნულ სამუშაოებს რეგიონული განვითარების ფონდი აფინანსებს.

დაგეგმილია ახალი ბაღის მშენებლობა სოფელ ჩუნჩხაში, ტენდერი უკვე გამოცხადებულია.

დასრულდა სოფელ ხულგუმოსა და სოფელ კარწახის საბავშვო ბაღების მშენებლობა და ახალი სასწავლო წლიდან სრული დატვირთვით დაიწყებენ მუშაობას.

გვაქვს ასევე პროექტები, რომლებიც წყლის სისტემების მოწესრიგებას გულისხმობს. მსგავსი ტიპის სამუშაოები უკვე დასრულდა სოფელ აბულში.

დასრულდა კიდევ ერთი მნიშვნელოვანი პროექტი, რომელიც არაგვა-გომანის 3-კილომეტრიანი გზის აღდგენას გულისხმობდა. პროექტი რეგიონული განვითარების ფონდიდან დაფინანსდა", განუცხადა GUARDIAN.GE-ს ახალქალაქის მერმა.