„ეკლესიას რომ გვჯეროდეს, რომ უდანაშაულოა, ჩვენ გამოვიყვანდით აქამდე", აღნიშნული განცხადება საქართველოს პატრიარქის ქორეპისკოპოსმა, მეუფე იაკობმა დეკანოზ გიორგი მამალაძესთან დაკავშირებით გააკეთა.

როგორც მეუფე იაკობმა სამების საკათედრო ტაძარში წმინდა ილია წინასწარმეტყველის ხსენების დღესთან დაკავშირებული საზეიმო წირვა-ლოცვის დასრულების შემდეგ, მედიის წარმომადგენლებთან საუბრისას განაცხადა, წმინდა სინოდი მამა გიორგი მამალაძისთვის დეკანოზის წოდების ჩამორთმევაზე იმსჯელებს.

ჟურნალისტების შეკითხვაზე, ფიქრობს თუ არა პატრიარქიც, რომ დეკანოზი გიორგი მამალაძე ე.წ. ციანიდის საქმეში დამნაშავეა, მეუფე იაკობმა განაცხადა: „დიახ".

მანვე აღნიშნა, რომ პირად საუბარში მეუფე გრიგოლმაც დაუდასტურა, რომ დეკანოზი მამალაძე დამნაშავეა.

პატრიარქის ქორეპისკოპოსმა თქვა, რომ დაკავებული სასულიერო პირი „მატყუარა ადამიანია" და დეკანოზის იმ განცხადებას, რომ ის და პატრიარქის მდივანი შორენა თეთრუაშვილი საპატრიარქოში ყველაზე დიდი გავლენებით გამოირჩევიან და მსჯავრდებულის წინააღმდეგ გამიზნულად მოქმედებენ, ჭორი უწოდა.

მეუფე იაკობი გამოეხმაურა ასევე იმ სასულიერო პირების განცხადებასაც, რომლებიც მიიჩნევენ, რომ ე.წ. ციანიდის საქმესთან დაკავშირებით, საგანგებო შეკრება უნდა გაიმართოს.

„არ გვინდოდა, რომ ეს თემა ძალიან გახმაურებულიყო და თუ არ მოისვენებენ ზოგიერთები, ვინც მას ვითომ იცავენ, თვითონაც გაეხვევიან შარში", განაცხადა მეუფე იაკობმა.