„ევროპული საქართველოს“ წევრის და ხორავას ქუჩაზე მკვლელობის საქმეზე შექმნილი დროებითი საგამოძიებო კომისიის თავმჯდომარე სერგი კაპანაძე აცხადებს, რომ იუსტიციის მინისტრთან ერთი კითხვა ჰქონდათ - თვლიდა თუ არა წულუკიანი, რომ ირაკლი შოთაძე არ უნდა გადამდგარიყო, რაზეც წულუკიანმა უპასუხა, რომ ასე თვლიდა. კაპანაძის თქმით, ამ პასუხის შემდეგ წულუკიანმა დიდი პასუხისმგებლობა აიღო საკუთარ თავზე.

„როდესაც ირაკლი შოთაძე გადადგა, თეა წულუკიანმა შეაქო შოთაძე. შოთაძის გადადგომის შემდეგ დადგინდა, ძალიან ბევრი გარემოება, მათ შორის ის, რომ მთელი რიგი საგამოძიებო მოქმედებები არ ჩატარებულა. კითხვები მდგომარეობდა შემდეგში, რომ ამ ყველაფრის მიუხედავად, თუ თვლიდა, რომ შოთაძე არ უნდა გადამდგარიყო. თეა წულუკიანმა დაადასტურა, რომ ირაკლი შოთაძე არ უნდა გადამდგარიყო, შესაბამისად, მთელი პასუხისმგებლობა თავად აიღო, სხვა კითხვები მასთან არ გვქონდა“, განაცხადა სერგი კაპანაძემ.