ირანის პრეზიდენტმა, ჰასან რუჰანიმ შეერთებული შტატების მიერ თეირანისთვის ეკონომიკური სანქციების კვლავ დაწესებას, რომელიც შუაღამისას შევიდა ძალაში, „ფსიქოლოგიური ომი“ უწოდა, რომლის მიზანიც, რუჰანის თქმით, „ირანელებს შორის უთანხმოების დათესვაა“.

სანქციები, რომლებიც ვაშინგტონის მიერ ბარაქ ობამას პრეზიდენტობისას მიღწეული ირანის ბირთვული შეთანხმებიდან ცალმხრივად გამოსვლის შემდეგ შევიდა ძალაში, ეკონომიკის სხვადასხვა სექტორს შეეხება და ირანის ნავთობის ვაჭრობის წინააღმდეგ სადამსჯელო ქმედებად მოიაზრება.

ევროპის კავშირმა სანქციების წინააღმდეგ გაილაშქრა და პირობა დადო, რომ დაიცავს ფირმებს, რომლებიც „კანონიერ ბიზნესს“ ეწევიან.

რა სფეროებს ეხება სანქციები?

დონალდ ტრამპის მიერ ხელმოწერილი საპრეზიდენტო განკარგულების მიხედვით, სანქციები ასეთია: ირანის მთავრობას ეკრძალებს აშშ-ის ბანკნოტების შეძენა;

სამიზნეებს შორისაა, ირანის ოქროთი და სხვა ძვირფასი ლითონებით ვაჭრობა;

გრაფიტის, ალუმინის, ქვანახშირის წარმოება;

ირანულ ვალუტასთან, რიალთან დაკავშირებული ტრანზაქციები;

ირანის საავტომობილო სექტორი.

„მათ სურთ წამოიწყონ ფსიქოლოგიური ომი ირანელი ერის წინააღმდეგ. მოლაპარაკებებს, სანქციებთან ერთად, აზრი არ აქვს. ჩვენ ყოველთვის დიპლომატიის და მოლაპარაკებების მომხრე ვართ, მაგრამ მოლაპარაკებებს სჭირდება კეთილსინდისიერება“, განაცხადა ირანის პრეზიდენტმა, რომელმაც ტრამპის ადმინისტრაცას ასევე ბრალი დასდო იმაში, რომ ირანს, აშშ-ის ნოემბრის შუალედური არჩევნებსი წინ, საშინაო პოლიტიკურ ბერკეტად იყენებს.

გერმანიის, დიდი ბრიტანეთის და საფრანგეთის საგარეო საქმეთა მინისტრებმა ორშაბათს განცხადება გაავრცელეს, რომელშიც ნათქვამია, რომ ირანის ბირთვული შეთანხმება გლობალური უსაფრთხოებისთვის „არსებით“ დოკუმენტად რჩება.