ექსპრემიერისა და არასამთავრობო ორგანიზაცია „მოქალაქე“-ს დამფუძნებლის, ბიძინა ივანიშვილის განცხადებით, მთავრობის წევრები აქტიურად ცდილობენ მოიძიონ რესურსები იმისთვის, რათა სტიქიის შედეგები მაქსიმალურად აღმოფხვრან.

ივანიშვილის თქმითვე, ამ საქმიანობაში საზოგადოების წევრები და ბიზნესმენები აქტიურად არიან ჩართულები, თუმცა, თუ მთავრობა მთლიანი თანხის მობილიზებას ვერ შეძლებს, ის ყველა იმ დანაკლისს აანაზღაურებს, რაც მთავრობას სტიქიის შედეგების აღმოფხვრისთვის დასჭირდება.

ამის შესახებ ივანიშვილმა „შეფასებისა და გამოცდების ეროვნულ ცენტრში“ „მოქალაქის“ ახალი პროექტის პრეზენტაციის შემდეგ განაცხადა.

„მე საჯაროდ განვაცხადე და კიდევ გავიმეორებ, რომ ყველამ თავისი საქმე უნდა აკეთოს. ეს საქმე ძირითადად მთავრობის საკეთებელია და ისინი აქტიურად ცდილობენ, მოიძიონ რესურსები იმისთვის, რათა ის ხარჯები, რაც სტიქიამ და ამ უბედურებამ მოიტანა, მაქსიმალურად დააკმაყოფილონ და დაფარონ. რასაც ვერ შეძლებენ, მე განვაცხადე და კიდევ ერთხელ ვიმეორებ, რომ დავაფინანსებ. მთავრობას ჩემი სახით ასეთი დაზღვევა აქვს. ბიზნესსექტორი, ამ კუთხით, ძალიან აქტიურობს და მადლიერებით ვიხსენებ, რომ მირეკავენ ნაცნობი ბიზნესმენები და დაფინანსებაში მონაწილეობის მიღებას ცდილობენ“, - განაცხადა ბიძინა ივანიშვილმა.

13 ივნისს, ძლიერი წვიმის შედეგად, მდინარე ვერე ადიდდა, რამაც თბილისის ცენტრალური ქუჩების დატბორვა გამოიწვია. წყალდიდობის შედეგად ქალაქში როგორც მატერიალური ისე ადამიანური მსხვერპლი დიდია. პრემიერ-მინისტრ ირაკლი ღარიბაშვილის განცხადებით, ზარალი 100 მილიონს გადააჭარბებს. ბოლო მონაცემებით, სტიქიის შედეგად 19 ადამიანია გარდაცვლილი, 3 კი დაკარგულად ითვლება.