ვანის მუნიციპალიტეტში დღეს, 8 აგვისტოს, საქართველოს თავისუფლებისა და დამოუკიდებლობისთვის მებრძოლი ჯარისკაცების ხსოვნას პატივი მიაგეს.

დილიდან წმინდა ნინოს მშობლების ზაბულონის და სოსანას სახელობის ტაძარში ომში დაღუპულთა სულის მოსახსენიებელი წირვა აღევლინა, რომელსაც ვანის მუნციპალიტეტის მერი ალექსანდრე გოგორიშვილი მოადგილეებთან და ადგილობრივი ხელისუფლების წევრებთან ერთად დაესწრო.

მოგვიანებით ხელისუფლების წარმომადგენლებმა ომში დაღუპულთა მემორიალი გვირგვინით შეამკეს.

„დღეს 2008 წლის აგვისტოს მოვლენებიდან 10 წელი გავიდა. ფასდაუდებელია ქართველი ჯარისკაცების ღვაწლი, სამშობლოს ერთიანობისთვის მათ დათმეს საკუთარი სიცოცხლე, ქართველი ერი არასდროს დაივიწყებს ამ თავგანწირვას, ქედს ვიხრი მათი ვაჟკაცობის წინაშე“, აღნიშნა ვანის მერმა ალექსანდრე გოგორიშვილმა.

2008 წლის რუსეთ-საქართველოს ომში 5 ვანელი ჯარისკაცი: ილია გაბუნია, დავით დვალიშვილი, მიშიკო დვალიშვილი, შოთა ხურციძე და შალვა ტრაპაიძე გმირულად დაიღუპნენ.

ვანის მუნიციპალიტეტის მერი ალექსანდრე გოგორიშვილი ადგილობრივი ხელისუფლების წარმომადგენლებთან ერთად, ომში დაღუპულთა საფლავებზეც მივიდა და პატივი მიაგო გარდაცვლილთა ხსოვნას.

დღესვე ადგილობრივი ხელისუფლების ინიციატივით, საქართველოს თავისუფლებისა და დამოუკიდებლობისთვის ბრძოლაში დაღუპულთა ოჯახის წევრებს ერთჯერადი დახმარების სახით ბიუჯეტიდან 500-500 ლარი ჩაერიცხათ.

დღის ბოლოს ლევან გერსამიას სახელობის კულტურის ცენტრში, 2008 წლის რუსეთ-საქართველოს ომის თემატიკაზე შექმნილი ფილმის „შინდისის გმირები“-ს ჩვენება გაიმართა.

ინფორმაციას ვანის მუნიციპალიტეტის მერიის პრესსამსახური ავრცელებს.