საქართველოს პრემიერ მინისტრი მოუწოდებს რუსეთის ფედერაციას, გაიყვანოს საქართველოს ტერიტორიიდან სამხედრო დანაყოფები.

მთავრობის მეთაური აცხადებს, რომ რუსეთის პოლიტიკურმა ხელმძღვანელობამ უნდა შეასრულოს რუსეთ-საქართველოს 2008 წლის აგვისტოს ომის შემდგომი, ცეცხლის შეწყვეტის ხელშეკრულების პირობებით ნაკისრი ვალდებულება, რაც სწორედ საქართველოს ტერიტორიიდან სამხედრო ძალის გაყვანას გულისხმობს.

„რა თქმა უნდა, რუსეთი არის აგრესორი. მან მოახდინა ჩვენი ტერიტორიების ოკუპაცია და ეს არის ერთმნიშვნელოვანი. უფრო მეტიც, მას ეს არ გაუკეთებია მხოლოდ 2008 წელს, 90-იანი წლების დასაწყისშივე, რუსეთი ახორციელებდა საქართველოს ტერიტორიების ფაქტობრივ ანექსიას. აქვე ისიც მინდა განვაცხადო, რომ ბევრი ევროპელი პოლიტიკოსი, მათ შორის, ჩვენი ამერიკელი მეგობრები აცხადებენ, რომ ჩვენი მეგობარი ქვეყნები მაშინ აფრთხილებდნენ მაშინდელ პოლიტიკურ ხელმძღვანელობას საქართველოსი - რომ რუსეთი გეგმავდა საომარი ოპერაციების სცენარის განხორციელებას, ხოლო სამწუხაროდ, მაშინდელმა ხელმძღვანელობამ იმის მაგივრად, რომ თავიდან აერიდებინა მსგავსი მოვლენების განვითარება და მოეხდინა ჩვენი მეგობარი ქვეყნების, მსოფლიოთანამეგობრობის ჩართულობით პრევენციაზე ორიენტირება, მან ვერ შეუშალა ხელი რუსეთის მიერ დაგეგმილი სცენარის განხორციელებას საქართველოში. მათ ვერ აარიდეს ქვეყანას ეს საფრთხე და შესაბამისად, მთელი საქართველო აღმოჩნდა კატასტროფულ სიტუაციაში.

აქვე ისიც მინდა გითხრათ, რომ ამ ორი დღის განმავლობაში, მე კიდევ რამდენჯერმე მოვისმინე, რომ რუსეთმა აგრესია განახორციელა 2008 წელს და ბევრი არ საუბრობს 90-იან წლებზე. მინდა კიდევ ერთხელ შეგახსენოთ, რომ რუსეთის ფედერაცია ფაქტობრივ ანექსიას ახორციელებდა საქართველოს ტერიტორიების 90-იანი წლების დასაწყისშივე - მაშინ, როდესაც ჩვენ მოვიპოვეთ დამოუკიდებლობა და სწორედ ამის შემდეგ ჩაირთო ის აგრესიული მანქანა, რომელმაც გააგრძელა შემდეგ თავისი სცენარების რეალიზება უკვე 2008 წელს.

ეს არის ჩემი შეფასება, ეს ჩვენი პოლიტიკური გუნდის შეფასება. რა თქმა უნდა, რუსეთი არის აგრესორი, მან მოახდინა ჩვენი ტერიტორიების ოკუპაცია და კიდევ ერთხელ მსურს განვმეორდე, რომ მათ აქვთ აღებული ვალდებულება 2008 წლის ცეცხლის შეწყვეტის ხელშეკრულების მიხედვით და მინდა კიდევ ერთხელ მოვუწოდო, რომ გაიყვანონ თავიანთი სამხედრო დანაყოფები საქართველოს ტერიტორიიდან ისევე, როგორც ამას ითვალისწინებს ეს საერთაშორისო შეთანხმება", განაცხადა მამუკა ბახტაძემ მთავრობის ადმინისტრაციაში გამართულ ბრიფინგზე.