პარტია „თავისუფალი დემოკრატების“ წევრი შალვა შავგულიძე TV პირველის ეთერში, „ლევან ჩხაიძის დღის ამბებში“ აცხადებს, რომ მოქმედი პრეზიდენტი გიორგი მარგველაშვილი არის დამოუკიდებელი და ამ ინსტიტუტისთვის დამოუკიდებლობის შენარჩუნება, არსებული კანდიდატებიდან, დავით უსუფაშვილს შეუძლია და სწორედ ამიტომ „თავისუფალი დემოკრატები“ მას ვუჭერთ მხარს.

„ამ საპრეზიდენტო არჩევნების მიმართ „თავისუფალი დემოკრატები“ ვაყენებთ ორ ძირითად პოლიტიკურ დატვირთვას - პირველი, ის რომ ამ არჩვენების შედეგების მიხედვით უნდა გახდეს ისეთი კანდიდატი პრეზიდენტი, რომელიც უზრუნველყოფს ამ ინსტიტუტის დამოუკიდებლობის შენარჩუნებას „ქართული ოცნების“ ხელისუფლებისაგან. არსებული პრეზიდენტის, ბატონ გიორგი მარგველაშვილის სასახელოდ უნდა ითქვას, მან შეუნარჩუნა ეს დამოუკიდებლობა პრეზიდენტის ინსტიტუტს, ამ მდგომარეობას სჭირდება შენარჩუნება. 

მეორე ძირითადი პოლიტიკური დატვირთვა არის ის, რომ ამ არჩევნების პროცესში პროდასავლური ოპოზიციური ძალების გარკვეული კონსოლიდაციის პროცესი დაიწყოს, ვგულისხმობ ოპოზიციურ ძალებს, რომლებიც არ განეკუთნებიან, არც „ქართულ ოცნების“ და არც „ნაციონალური მოძრაობის“ პოლიტიკურ არეალს, რადგან მათ შეძლონ საპარლამენტო არჩვენებამდე ამ კონსოლიდირების გაზრდა და ასეთმა ძალებმა შეძლონ „ქართული ოცნების“ ხელისუფლების შეცვლა. ამ პოლიტიკური თვალსაზრისით მიგვაჩნია, რომ დავით უსუფაშვილი არის საუკეთესო კანდიდატურა, მიგვაჩნია, რომ მას აქვს შანსი, წარმოდგენილ საპრეზიდენტო კანდიდატებს შორის, გამარჯვების და გამარჯვების შემდეგ პრეზიდენტის ინსტიტუტის დამოუკიდებლობის შენარჩუნების“, განაცხადა შალვა შავგულიძემ.