საქართველოს მესამე პრეზიდენტი მიხეილ სააკაშვილი ლარის კურსის ვარდნას ეხმაურება.

როგორც მან „ფეისბუქის" საკუთარ გვერდზე გავრცელებულ ვიდეომიმართვაში განაცხადა, ეროვნული ვალუტის სტაბილური კურსი 2008 წლის ომის პერიოდშიც კი, შენარჩუნებული იყო.

სააკაშვილი ამბობს, რომ ბიძინა ივანიშვილის მმართველობის გაგრძელების შემთხვევაში, უახლოეს მომავალში ერთი დოლარის ღირებულება 4 ლარი გახდება.

„ლარის კურსმა ისევ დაიწყო მკვეთრად ვარდნა და მთავრობა ისევ სრულ უუნარობაშია, თუმცა, საქართველოს არ ჰყავს მთავრობა, საქართველოს ჰყავს ხარბი ოლიგარქი, რომელმაც საბანკო მონოპოლიით გაანადგურა ქართული ოჯახების ბიუჯეტი და ფულს აკეთებს ვალუტის კურსზე თამაშით.

ამ დღეებში სრულდება აგვისტოს ომის 10 წლისთავი, მე მინდა შეგახსენოთ, რომ ამხელა არმია დაგვესხა თავს, ასეთი უბედურება დაგვატყდა თავს და ომის დროს და შემდგომ, ჩვენ შევინარჩუნეთ ვალუტის კურსი და ჩემს დროს ვალუტის კურსი იყო 1.64 და ახლა არის, რაც არის და თუ ივანიშვილი გაგრძელდა, ღმერთმა არ ქნას, საქართველოში, თუ თქვენ არ გამოიჩინეთ აქტიურობა, თუ თქვენ არ ჩაერთეთ და ისევ მიეცით საშუალება, რომ იყიდოს არჩევნები, გარანტიას გაძლევთ, რომ სულ მალე კურსი იქნება მინიმუმ 4, მე ვიცი, რაზე ვსაუბრობ. ჩემს დროს იყო 1.64, ივანიშვილის დროს მალე იქნება 4, ამიტომ გამოვიფხიკოთ ყურები, გავახილოთ თვალები ყველამ, ვიმოძრაოთ ყველამ, ჩვენ ყველაფერი გამოგვივა", აცხადებს საქართველოს მესამე პრეზიდენტი ვიდეომიმართვაში.