„ლეიბორისტული პარტიის“ ლიდერმა და პრეზიდენტობის კანდიდატმა შალვა ნათელაშვილმა დიდგორის ბრძოლის დღესთან დაკავშირებით გელათში, დავით აღმაშენებლის საფლავზე გვირგვინი მიიტანა. ნათელაშვილმა განაცხადა, რომ საქართველოს მთლიანობის აღდგენისთვის ჯერ შიდა მტერი უნდა დამარცხდეს.

„900 წლის უკან ქართველთა მხედრობამ დიდგორში გამანადგურებელი დარტყმა აგემა მტრებს, რამაც საფუძველი ჩაუყარა ქართულ-კავკასიური უძლიერესი იმპერიის დაარსებას. ყველაფერი ამის შემოქმედი გახლავთ დავით მეოთხე აღმაშენებელი, მის საფლავზე ვართ და ვეუბნებით მეფეთა მეფეს უდიდეს მადლობას დიდგორისათვის, უხდით უდიდეს ბოდიშს,  რომ ვერ შევინარჩუნეთ მისი აშენებული საქართველო და ვაძლევთ პირობას რომ ჩვენ საქართველოს ერთიანობას აღვადგენთ და ვიქნებით ღირსეული მემკვიდრეები მისი. ჩვენ დღეს უნდა დავამარცხოთ არამარტო გარეშე მტერი, არამედ გარეშე მტრის დამარცხება უნდა დავიწყოთ შიდა მტრების, ოლიგარქის, ფეოდალების, ბაღვაშების დამარცხებით“, განაცხადა შალვა ნათელაშვილმა.