„ლეიბორისტული პარტიის“ თავმჯდომარემ და საპრეზიდენტო კანდიდატმა, შალვა ნათელაშვილმა თბილისში, მეტროსადგურ „რუსთაველთან“ საკუთარი მხარდამჭერების ხელმოწერების შეგროვების პროცესის გაცნობისა და ხალხთან შეხვედრის შემდეგ ეროვნული ვალუტის კურსის ცვლილებაზე ისაუბრა და აღნიშნა, რომ ლარის „თამაშის“ მთავარი მიზეზი ივანიშვილისა და „ყაჩაღი“ ბანკების საბანკო მანიპულაციებია. მანვე დაამატა, რომ თურქული ლირის კურსის ცვლილება ლართან არანაირ კავშირში არ არის და ივანიშვილმა და მისმა გუნდმა „რამდენიმე ასეული მილიონის მოხსნის ახალი მიზეზი“ ნახეს.

„მთავარი მიზეზი ლარის თამაშისა, რაც ივანიშვილის მოსვლის შემდეგ წესად იქცა, არის ყაჩაღი ბანკებისა და ოლიგარქების საბანკო მანიპულაცია, რითაც ისინი მილიონებს შოულობენ. ამისათვის ივანიშვილი ნებისმიერ მოვლენას იყენებს, როგორიც არის, ახალ ზელანდიაში მეტეორის ჩამოვარდნა, ინდონეზიაში ვულკანის ამოფრქვევა და ეხლა იყენებენ თურქული ლირის კურსთან დაკავშირებულ მოვლენებს, რომელიც არანაირ რყევას არ უნდა იწვევდეს. ვინაიდან ჩვენ არ გაგვაქ თურქულ ბაზარზე საქონელი, იმათი ვალუტის კურსის ცვლა ჩვენ არ უნდა გვეხებოდეს. ჩვენ რომ გაგვქონდეს მზა პროდუქცია, როგორც თურქებს შემოაქვთ ჩვენთან, მაშინ მათი ვალუტის კურსის ცვლილება პირდაპირ აისახებოდა ჩვენსაზე. ივანიშვილმა ნახა ახალი მიზეზი, რომ რამდენიმე ასეული მილიონი მოხსნას. მოგეხსენებათ, ბანკები, სავალუტო და საფინანსო ინსტიტუტები მათია და ეს ყველაფერი წუთებში კეთდება. ამ ყველაფერს, შემდეგ, სერიოზული გამოძიება დასჭირდება, რათა გაირკვეს, რამდენი მილიარდი მიითვისა ამ წლების განმავლობაში ივანიშვილმა და მისმა გუნდმა, მისმა ქართუ ბანკმა და მისმა ხაზარაძეებმა. არ იფიქროთ, რომ ისინი ერთმანეთში ჩხუბობენ. ისინი ქართველი ხალხის წინააღმდეგ და დიდი ფულის გასაკეთებლად საერთო ენას ყოველთვის გამონახავენ“, განაცხადა შალვა ნათელაშვილმა.