„ძალა ერთობაშია“-ს საპრეზიდენტო კანდიდატმა, გრიგოლ ვაშაძემ ლეჩხუმში ამომრჩეველთან შეხვედრის შემდეგ განაცხადა, რომ სანამ ეროვნული ხელისუფლება არ მოვა ქვეყნის სათავეში, საქართველოს არაფერი არ ეშველება. ვაშაძე „ქართული ოცნებისთვის“ სახელის სასწრაფოდ გამოცვლას და მისთვის „კრიმინალების ორგანიზებული თანამეგობრობის“ დარქმევას მოითხოვს, რადგან მიიჩნევს, რომ „ეს არც ქართულია, არც ოცნება და არც ხელისუფლება არის“.

„შემოქმედმა ყველაფერი გააჩინა იმისათვის, რომ ადამიანმა ნორმალურად იცხოვროს რაჭაშიც და ლეჩხუმშიც - გვაკლია ერთადერთი რამ, ამ ქვეყანას აკლია ერთადერთი, აკლია ეროვნული ხელისუფლება. სანამ ეროვნული ხელისუფლება არ მოვა სათავეში, რომლისათვისაც მთავარი იქნება საქართველოს მოქალაქის განათლება, ჯანდაცვა, სამუშაო ადგილი და პერსპექტივა, ჩვენ ქვეყნას არაფერი არ ეშველება. ე.წ. „ქართულ ოცნებას“ სასწრაფოდ უნდა გამოუცვალონ სახელი და არ ვიცი რა უნდა დაარქვან - კრიმინალების ორგანიზებული თანამეგობრობა, რაღაც ასეთი, იმიტომ რომ ეს არც ქართულია, არც ოცნება არის, არც ხელისუფლება არის, არც პროფესიონალიზმია, არც ცოდნა არის და არც ქვეყნის სიყვარულია“, განაცხადა გრიგოლ ვაშაძემ.