გაერთიანებული ოპოზიციის, „ძალა ერთობაშია“ საპრეზიდენტო კანდიდატმა გრიგოლ ვაშაძემ ლეჩხუმში მოსახლეობასთან გამართული შეხვედრის შემდეგ განაცხადა, რომ საქართველოს დღევანდელი ხელისუფლება „აბსოლუტურად კორუმპირებული, უსაქმური და მავნებელია“ და საკუთარ მოქალაქეებს „გენოციდს“ უწყობს.

„ამას უკვე სიბრაზე და აღშფოთება აღარ ჰქვია, ამას ჰქვია ქართველების გენოციდი. ლეჩხუმში 500-ზე მეტი სიკვდილიანობაა ყოველ წელს, ჯვარი წერია ყველას, რა თქმა უნდა, და 30-ზე, 36-ზე, 40-ზე მეტი ბავშვი არ იბადება, განახევრებულია უკვე მოსახლეობა, იმის ნაწილი კიდევ ემიგრაციაში არის წასული. ეს არის ნამდვილი გენოციდი ქართველების. ადამიანებს უნდათ მიწაზე მუშაობა; ადამიანებს უნდათ მთის შენახვა; ადამიანებს უნდათ მთის სოფლების შენახვა და ამის შესაძლებლობა არ აქვთ, იმიტომ რომ გვყავს აბსოლუტურად კორუმპირებული, უსაქმური და მავნებელი ხელისუფლება“, განაცხადა ვაშაძემ ცაგერში და დაამატა, რომ ხელისუფლების სათავეში ეროვნული მთავრობის მოსვლის შემდეგ სოფლის მეურნეობა „21-ე საუკუნის რელსებზე“ გადავა.

„გავიმარჯვებთ თუ არა, მოვა თუ არა ეროვნული, ნამდვილად ეროვნული მთავრობა ხელისუფლების სათავეში, დეტალურად გათვლილი სოფლის მეურნეობის წინ წაწევის, პროგრესის და 21-ე საუკუნის რელსებზე გადაყვანის პროგრამა გვაქვს. სახელმწიფოს ჩარევის გარეშე ამის გაკეთება შეუძლებელი არის. დღეს გლეხს ამის გაკეთების საშუალება არ აქვს, მაგრამ შეიძლება ბიუჯეტიდან იმის თანხების გამოთავისუფლება, რომელიც საშუალებას მისცემს სოფლის მეურნეობაში მშრომელს, ნორმალურად იცხოვროს“, აღნიშნა გრიგოლ ვაშაძემ.