გაზეთ „ქრონიკა პლუსის“ მთავარმა რედაქტორმა ელისო კილაძემ ზაზა სარალიძესთან და მალხაზ მაჩალიკაშვილთან ერთად ევროპაში დაგეგმილ ვიზიტზე ისაუბრა, რომელიც სუს-ის „არასწორი“ ინფორმაციის გავრცელების გამო ჩაიშალა, და აღნიშნა, რომ მან ყველა მასალა გერმანიის ფედერალურ პოლიციაში და ამერიკის შეერთებულ შტატებში გადააგზავნა და, ასევე, მთავარ პროკურატურას გამოძიების დაწყების მიზნით მიმართა.

„ჩვენთვის გაუგებარი მიზეზების გამო, სახელმწიფო უსაფრთხოების სამსახურმა გააგზავნა დახურული ფაილით ცნობა, რომ ვიზიტის ორგანიზატორს, ამერიკის მოქალაქეს, პაატა აბჟანდაძეს, ელისო კილაძესა და ზაზა სარალიძეს შეყავდა ევროპის ტერიტორიაზე პირი, რომელიც ძებნილი და ეჭვმიტანილია ტერორიზმის ხელშეწყობაში. ყველა მასალა, რაც მქონდა, გადავაგზავნე გერმანიის ფედერალურ პოლიციაში და ამერიკის შეერთებულ შტატებში და ასევე განცხადებით მივმართე მთავარ პროკურატურას, რომ დაეწყო გამოძიება, რატომ მოხდა ვიზიტის ჩაშლა და რატომ მიაწოდა სუს-მა გერმანულ მხარეს არასწორი ინფორმაცია იმის თაობაზე, რომ ტერორიზმში ეჭვმიტანილი პირი იმყოფებოდა ამ ჯგუფის შემადგენლობაში“, განაცხადა მედიასთან საუბრისას ელისო კილაძემ, სანამ თბილისის პროკურატურაში გამოკითხვაზე შევიდოდა.