თბილისის მუნიციპალიტეტის მთავრობის სხდომაზე, დედაქალაქის მერმა, კახა კალაძემ „ელიავას ბაზრობის“ მიმდებარე ტერიტორიებზე ზედამხედველობის სამსახურის მიერ ჩატარებულ ღონისძიებებზე ისაუბრა და აღნიშნა, რომ საშენი მასალების ტროტუარებზე გადმოტანის პრობლემა მხოლოდ დიდუბის რაიონს არ ეხება და ეს პრობლემა ყველა რაიონში მოგვარდება.

„ჩემი დავალებით, დიდუბის რაიონში, კერძოდ, „ელიავას ბაზრობის“ მიმდებარე ტერიტორიაზე ზედამხედველობის სამსახურს დავალებული ქონდა ხოშარაულის, აგლაძისა და გიორგაძის ქუჩებზე მოეწესრიგებინათ იქ არსებული მდგომარეობა. ყველას კარგად გვახსოვს, თუ რა ხდებოდა - ტროტუარებზე გამოტანილი იყო საშენი მასალები, საბურავები და შეუძლებელი იყო ფეხით გადაადგილება, რადგან ყველაფერი ტროტუარზე იყო გადმოტანილი. ეს ყველაფერი მოძრაობასაც აფერხებდა, რადგან ფეხით მოსიარულე ადამიანებს გზის სავალ ნაწილზე გადმოსვლა უხდებოდათ და ამას ავარიაც მოჰყოლია. შესაბამისად, დავალების შესრულების შემდეგ, ეს ყველაფერი მოწესრიგდა. დღეს აბსოლუტურად გასუფთავებულია ტროტუარები და შეგიძლიათ გადაამოწმოთ. ეს პროცესი უნდა გაგრძელდეს და ზედამხედველობა უნდა გავაგრძელოთ. ირაკლი ხმალაძეს მინდა დავავალო, რომ ზედამხედველობის სამსახურს კოორდინირება გავუწიოთ, რათა ასეთი ადგილები მოწესრიგდეს და გატარდეს იგივე ღონისძიებები. ეს მარტო დიდუბის რაიონს არ ეხება. სხვა რაიონებშიც გვაქვს ასეთი სიტუაცია. კიდევ ერთხელ მინდა გავიმეორო, რომ ტროტუარებზე გადაადგილება შეუძლებელი იყო და იერსახესაც სერიოზულ პრობლემას უქმნიდა. სად გაგიგიათ, ქალაქის ცენტრში, ქუჩებზე გამოტანილი საშენი მასალები ასე, ღიად, ეყაროს?! ყველა რაიონში, სადაც ამგვარი პრობლემებია, გატარდება ღონისძიებები“, განაცხადა კახა კალაძემ.