ღირსეული პარტნიორი 2018“ დასრულდა. დახურვის ოფიციალური ცერემონიალი ვაზიანში, მე-11 პოლიგონზე გაიმართა.

სწავლებაში მონაწილე 13 ქვეყნის სამხედრო მოსამსახურეებს და მოწვეულ სტუმრებს სიტყვით საქართველოს თავდაცვის მინისტრმა მიმართა და საქართველოში მრავალეროვნული საერთაშორისო წვრთნების ჩატარების მნიშვნელობაზე, სტრატეგიული მზადყოფნისა და აშშ-ის ავტორიზაციის აქტში გაჟღერებულ პოლიტიკასთან საქართველოს აბსოლუტურ თანხვედრაზე გაამახვილა ყურადღება.

„ამ აქტში აღნიშნულია, რომ საქართველო უკრაინასთან ერთად უნდა მონაწილეობდეს უფრო ფართომასშტაბიან რეგიონალურ წვრთნებში, შავი ზღვის ფარგლებში. საქართველო ადეკვატურად პასუხობს იმ პოლიტიკას, რომელიც ავტორიზაციის აქტით არის გაჟღერებული და პასუხობს იმ მთავარ მოთხოვნებს, რაც ქართული შეიარაღებული ძალების მიმართ არის წაყენებული, რაც უკავშირდება ჩვენი თავდაცვისუნარიანობის გაძლიერებას და უკავშირდება ნატოს სტანდარტებთან დაახლოების გაუმჯობესებას,“ აღნიშნა ლევან იზორიამ.

სამხედრო მოსამსახურეებს სიტყვით მიმართეს ასევე, საქართველოს შეიარაღებული ძალების გენერალური შტაბის უფროსმა, გენერალ-მაიორმა ვლადიმერ ჩაჩიბაიამ და აშშ-ის ჯორჯიის შტატის ეროვნული გვარდიის გაერთიანებული შტაბის უფროსმა, ბრიგადის გენერალმა რეჯინალდ ნილმა.

სწავლების ოფიციალური დახურვის ღონისძიება დაჯილდოების ცერემონიალით დასრულდა. სწავლების დაგეგმარებასა და აღსრულებაში გამოჩენილი ღვაწლისთვის წვრთნაში მონაწილე ქვეყნების სამხედრო მოსამსახურეებს სამსახურებრივი-საშტატო იარაღი და უწყებრივი მედლები „გენერალი კვინიტაძე“ და „გენერალი მაზნიაშვილი“ გადაეცათ.

საქართველომ „ღირსეულ პარტნიორს“ წელს მეოთხედ უმასპინძლა. წლევანდელი სწავლება სტაბილურობის, თავდაცვითი და შეტევით ოპერაციებში უნარ-ჩვევების გაუმჯობესებას; საქართველოს, აშშ-ის და პარტნიორი ქვეყნების შეიარაღებული ძალების მზადყოფნისა და ურთიერთთავსებადობის ამაღლებას; ასევე, შავი ზღვის რეგიონში სტაბილური და უსაფრთხო გარემოს შენარჩუნებაში წვლილის შეტანას ემსახურებოდა.

ინფორმაციას საქართველოს თავდაცვის სამინისტრო ავრცელებს.