საქართველოს პრეზიდენტის ადმინისტრაციის შესახებ სახელმწიფო აუდიტის სამსახურის მიერ გამოქვეყნებულ ფინანსური აუდიტის ანგარიშს გამოეხმაურა პარლამენტის ფრაქცია „ერთიანი ნაციონალური მოძრაობის“ თავმჯდომარე რომან გოცირიძე „რუსთავი 2“-თან საუბრისას. დეპუტატის თქმით, აუდიტის დასკვნას „პოლიტიკური ელფერი დაკრავს“.

„მილიონი ლარი პრეზიდენტმა გასცა 120 კაცზე, როდესაც მილიონ ლარს ღებულობდა რამდენიმე მინისტრი ამ ერთი წლის განმავლობაში, ზოგიერთი მინისტრი ღებულობდა ხელფასზე 2-ჯერ მეტ პრემიას და დანამატს და არავის მოუთხოვია მათთვის დასაბუთება, თუ რატომ აკეთებდნენ ამას. ასე რომ, ამ დასკვნას პოლიტიკური ელფერი დაკრავს“, განაცხადა რომან გოცირიძემ.

საქართველოს პრეზიდენტის ადმინისტრაციის შესახებ სახელმწიფო აუდიტის სამსახურის მიერ გამოქვეყნებული ფინანსური აუდიტის ანგარიშის მიხედვით, 2017 წელს პრეზიდენტის ადმინისტრაციის მიერ შრომის ანაზღაურებაზე გაწეული ხარჯი მთლიანად 4,622,445 ლარს შეადგენს, აქედან თანამდებობრივი სარგო – 2,649,852 ლარია, დანამატი – 1,067,922 ლარი, ხოლო პრემია – 904,671 ლარი. დამტკიცებული საშტატო რიცხოვნობა 140-ია, ხოლო ფაქტობრივად დასაქმებულ თანამშრომელთა რაოდენობა – 120.

აუდიტის სამსახური აღნიშნავს, რომ 2017 წელს დანამატების გაცემის პრაქტიკა ვერ უზრუნველყოფდა შრომის ანაზღაურების სათანადო გამჭვირვალობას, ვინაიდან ბრძანებებში დანამატის გაცემის მიზანშეწონილობა სათანადოდ დასაბუთებული არ იყო.