„შენების მოძრაობის“ პრეზიდენტობის კანდიდატი დავით უსუფაშვილი, რომელსაც მხარს „თავისუფალი დემოკრატები“ და „ეროვნული ფორუმი“ უჭერს,  TV პირველის გადაცემაში, „დღის ამბები ლევან ჩხაიძესთან ერთად“ ირაკლი კობახიძის განცხადებას ეხმაურება და აცხადებს, რომ თუ პრეზიდენტს თავისი უფლებამოსილების წონის მიხედვით, ავლაბრის სასახლე არ შეეფერება, მაშინ პარლამენტის თავმჯდომარე თავისი უფლებების წონის მიხედვით, რომელიმე შენობის სარდაფის, მინუს მესამე სართულზე უნდა განთავსდეს, რადგან ინდივიდუალურად თავმჯდომარეს მარტო თანაშემწეების დანიშვნა შეუძლია.

„თუ სასახლის ზომა უნდა იყოს კავშირში კონკრეტული თანამდებობის პირის ადმინისტრაციულ საძალაუფლებო წონასთან, მაშინ მე გეტყვით ასე - პარლამენტის თავმჯდომარე თავისი ერთპიროვნული საძალაუფლებო წონით უნდა განთავსდეს, რომელიმე შენობის სარდაფის მინუს მესამე სართულზე, იმიტომ რომ პარლამენტის თავმჯდომარეს ინდივიდუალურად, მაქსიმუმი რაც შეუძლია გააკეთოს, თავისივე თანაშემწეები დანიშნოს ერთპიროვნულად და შეიძლება გუგული მაღრაძე არ გაუშვას თამბაქოს წინაღმდეგ გამართულ კონფერენციაზე სადმე, სხვა არანაირი ფუნქცია ერთპიროვნულად პარლამენტის თავმჯდომარეს არ აქვს, მაშინ კეთილი ინებოს, ჩავიდეს სარდაფში და იქ დაჯდეს თავისი წონის შესაბამისად და მერე ილაპარაკოს იმაზე, რომ თურმე პრეზიდენტს არ აქვს სათანადო წონა და სახელმწიფოს მეთაური არ არის იმ დონის ადამიანი, რომ სადმე ნორმალურ სასახლეში იჯდეს“, განაცხადა დავით უსუფაშვილმა.