„თავის თავისთვის იცხოვრა ამ პოსტზე ამ პერიოდის განმავლობაში“, ასე შეაფასა პარლამენტის თავმჯდომარის მოადგილემ, ფრაქცია „ქართული ოცნების“ წევრმა, გიორგი ვოლსკიმ „რუსთავი 2“-თან საუბრისას პრეზიდენტ გიორგი მარგველაშვილის მოღვაწეობა მას შემდეგ, რაც სახელმწიფო აუდიტის სამსახურის მიერ საქართველოს პრეზიდენტის ადმინისტრაციის შესახებ ფინანსური აუდიტის ანგარიში გამოქვეყნდა.

„თავის თავისთვის იცხოვრა ამ პოსტზე ამ პერიოდის განმავლობაში და არც ის 2 მილიონი მიკვირს. უპრაკონოდ ხარჯავს იმ მოსაზრებებით და იმ გემოვნებით, რაც თვითონ გააჩნია და პასუხისმგებლობა პრაქტიკულად არაფერზე არ აქვს“, განაცხადა გიორგი ვოლსკიმ.

სახელმწიფო აუდიტის სამსახურის მიერ საქართველოს პრეზიდენტის ადმინისტრაციის შესახებ გამოქვეყნებულ ფინანსური აუდიტის ანგარიშის მიხედვით, 2017 წელს პრეზიდენტის ადმინისტრაციის მიერ შრომის ანაზღაურებაზე გაწეული ხარჯი მთლიანად 4,622,445 ლარს შეადგენს, აქედან თანამდებობრივი სარგო – 2,649,852 ლარია, დანამატი – 1,067,922 ლარი, ხოლო პრემია – 904,671 ლარი. დამტკიცებული საშტატო რიცხოვნობა 140-ია, ხოლო ფაქტობრივად დასაქმებულ თანამშრომელთა რაოდენობა – 120.

აუდიტის სამსახური აღნიშნავს, რომ 2017 წელს დანამატების გაცემის პრაქტიკა ვერ უზრუნველყოფდა შრომის ანაზღაურების სათანადო გამჭვირვალობას, ვინაიდან ბრძანებებში დანამატის გაცემის მიზანშეწონილობა სათანადოდ დასაბუთებული არ იყო.