პარლამენტის თავმჯდომარემ, ირაკლი კობახიძემ პრეზიდენტის სასახლის თემაზე „შენების მოძრაობის“ თავმჯდომარის და საპრეზიდენტო კანდიდატის, დავით უსუფაშვილის მიერ გაკეთებული განცხადების კომენტირებისას თქვა, რომ უსუფაშვილმა „ყველანაირი კუთხით დაუშვა შეცდომა და უნდა ვაპატიოთ“.

„დავით უსუფაშვილმა, მარტივად რომ ვთქვათ, დაუშვა უხეში შეცდომა. არავითარ ანალიზზე არ არის საუბარი. იყო ძალიან უხეში შეცდომა დაშვებული იმ გამონათქვამში ექსპერტული კუთხით, პოლიტიკური კუთხით და ადამიანური კუთხით. ყველანაირი კუთხით დაუშვა ადამიანმა შეცდომა და უნდა ვაპატიოთ. შეფასებები გაკეთდა და შესაბამისად, ეს საკითხი ამოწურულია“, განაცხადა ირაკლი კობახიძემ.

დავით უსუფაშვილმა, რომელსაც საპრეზიდენტო არჩევნებში მხარს „თავისუფალი დემოკრატები“ და „ეროვნული ფორუმი“ უჭერს, ოთხშაბათს განაცხადა, რომ თუ პრეზიდენტს თავისი უფლებამოსილების წონის მიხედვით, ავლაბრის სასახლე არ შეეფერება, მაშინ პარლამენტის თავმჯდომარე თავისი უფლებების წონის მიხედვით, რომელიმე შენობის სარდაფის, მინუს მესამე სართულზე უნდა განთავსდეს, რადგან ინდივიდუალურად თავმჯდომარეს მარტო თანაშემწეების დანიშვნა შეუძლია.