აჭარის ავტონომიური რესპუბლიკის მთავრობის თავმჯდომარე თორნიკე რიჟვაძე სასტუმრო „ველმონდის“, ყოფილი „ლეოგრანდის“ დროებით დახურვასთან დაკავშირებით აცხადებს, რომ. მათთვის „უსაფრთხოების ნორმები უმთავრესია“.

„უსაფრთხოების ნორმები უმთავრესია. შესაბამისად, აჭარის ავტონომიური რესპუბლიკის მთავრობა, შესაბამის უწყებებთან ერთად, საგანგებო სიტუაციების მართვის სამსახურთან ერთად, ჩართული იყო ამ პროცესში. მიღწეულ იქნა კონკრეტული შეთანხმება, რომლის მიხედვითაც დასაქმებული პირები შეინარჩუნებენ სამუშაო ადგილს და ასევე ხელფასს. რაც შეეხება იმ ხარვეზებს და ნაკლოვანებებს, რომელიც უსაფრთხოების კუთხით ჰქონდა კომპანიას, უახლოეს მომავალში გამოასწორებს, რის შემდეგაც ჩვენ დავსხდებით და დავილაპარაკებთ, თუ როგორ შეიძლება გაგრძელდეს აღნიშნული ბიზნეს ოპერატორის საქმიანობა“, განაცხადა თორნიკე რიჟვაძემ.

მისივე თქმით, აჭარის ტურიზმის დეპარტამენტის აქტიური ჩართულობით ძალიან ეფექტურად, მოკლე ვადებში მოხდა ვიზიტორების გადაყვანა სხვადასხვა სასტუმროში.

საგანგებო სიტუაციათა მართვის სამსახურის მოთხოვნისა და სასამართლოს გადაწყვეტილების საფუძველზე, სასტუმრო „ველმონდი"(ყოფილი „ლეოგრანდი“) დღეს, 17 აგვისტოს, 18:00 საათზე დაიხურება. როგორც აჭარის მთავრობასა და საგანგებო სიტუაციათა მართვის სამსახურში აცხადებენ, სასტუმრო ფუნქციონირებას სახანძრო უსაფრთხოების ნორმების დაკმაყოფილებისთანავე დაიწყებს.