პარტია „ევროპული საქართველოს“ წევრი, დეპუტატი ირმა ნადირაშვილი აცხადებს, რომ „ქართულ ოცნებას“ ხალხის პრობლემები და ქვეყანაში არსებული ღრმა კრიზისი არ აინტერსებს და აქედან გამომდინარე, მოქალაქეებმა არა სალომე ზურაბიშვილი, არამედ ისეთი კანდიდატი უნდა აირჩიოს პრეზიდენტად, რომელიც პრობლემების მოგვარებაზე იქნება ორიენტირებული და არა „იმის შერჩევაში, რომელ სასახლეში და კაბინეტში დაიჭიროს ადგილი“.

„ეს ყველაფერი მიუთითებს იმაზე, რამდენად არ აინტერესებეს „ოცნებას“ ხალხის პრობლემები, რამდენად არ აინტერესებს ღრმა კრიზისი ეკონომიკური, რომელშიც ქვეყანაა შესული, რა ვითარებაც გვაქვს ლარის კურსთან დაკავშირებით. აქ, მთავარი არის ის, რომ სალომე ზურაბიშვილმა ვერ უნდა შეძლოს ამ არჩევნებში გამარჯვება და ხალხმა უნდა აირჩიოს პრეზიდენტი, რომელიც ამ პრობლემებზე იქნება ორიენტირებული და არა იმის შერჩევაში, რომელ სასახლეში და კაბინეტში დაიჭიროს ადგილი“, განაცხადა ირმა ნადირაშვილმა „რუსთავი 2“-ის ეთერში პრეზიდენტის სასახლესთან დაკავშირებით დასმული შეკითხვის საპასუხოდ.

თუკი 2018 წლის საპრეზიდენტო არჩევნებში დამოუკიდებელი კანდიდატი სალომე ზურაბიშვილი „ქართული ოცნების“ მხარდაჭერით გაიმარჯვებს, მას პრეზიდენტის ავლაბრის სასახლესა და ათონელის ქუჩაზე არსებულ რეზიდენციას შორის არჩევანის გაკეთება მოუწევს. ზურაბიშვილმა ამასთან დაკავშირებით უკვე გამოხატა თავისი პოზიცია და თქვა, რომ მისთვის უფრო კომფორტული და მისაღები ათონელის რეზიდენცია იქნება.

აღნიშნულ თემაზე კომენტარი დღევანდელ ბრიფინგზე მამუკა ბახტაძემ გააკეთა და თქვა, რომ არჩევანის გაკეთებისას გათვალისწინებული უნდა იყოს ის, თუ რომელი რეზიდენცია იქნება ნაკლებად ხარჯიანი.