სადღეისოდ წარმოდგენილ საპრეზიდენტო კანდიდატებს შორის ყველაზე ახლოს დგას სალომე ზურაბიშვილის კანდიდატურა, განაცხადა „ქართული ოცნების“ წევრმა, დეპუტატმა ეკა ბესელიამ „TV პირველის“ ეთერში.

მისი თქმით, გუნდში არის ასევე მოსაზრებები, რომ პარტიას თავისი კანდიდატურა უნდა ჰყავდეს და გამომდინარე იქიდან, რომ ჯერ საბოლოო თანხმობა ამ საკითხზე არ არსებობს, „ქართული ოცნების“ გადაწყვეტილების მიღებაც, რომელიმე დამოუკიდებელ კანდიდატს დაუჭიროს მხარი, ჭიანურდება.

„ყველა დასახელებულ კანდიდატთაგან, ვინც ჩანს დღეს საარჩევნო მარათონის პროცესში, ყველაზე ახლოს, მე ვიტყოდი, ეს ჩემი პირადი შეხედულებაა და არ მინდა, რომ ყველას სახელით ვისაუბრო, ყველაზე ახლოს დგას ნამდვილად ქალბატონი სალომე ზურაბიშვილის კანდიდატურა, მაგრამ იმის გათვალისწინებით, რომ, ამით არაფერი ფუჭდება და ჩვენც მეტი დრო გვაქვს პოლიტიკური კონსენსუსის მიღწევისთვის, არ არის დასამალი და ესეც ჩანს ცალკეულ კომენტარებში, რომ არის განსხვავებული მოსაზრებაც და არიან ჩვენი კოლეგებიც, რომლებიც მიიჩნევენ, რომ უნდა ჰყავდეს გუნდს თავისი კანდიდატი. ამიტომ, რადგან ეს განსხავავებული მოსაზრებები გაჩნდა, ამის გათვალისწინებით, დრო უფრო მეტად ამას სჭირდება, რომ კონსენსუსი იყოს ამ საკითხზე მიღწეული და დავარწმუნოთ ერთმანეთი, ვისაც განსხვავებულად მიაჩნია, ან ვინც პირიქით, მხარს უჭერს ან არ უჭერს. ეს არის სულ“, აღნიშნა ბესელიამ.