„ახალ ხედვებს, ახალ მიდგომებს, სჭირდება ახალი ადამიანები“, ასე შეაფასა მთავრობის ადმინისტრაციის რეგიონული სამსახურის უფროსმა, სოზარ სუბარმა „იმედის“ პირდაპირ ეთერში ჩართვისას გუბერნატორების მასობრივი დათხოვნა და სახელმწიფო რწმუნებულებად ახალი კადრების დანიშვნა.

შეკითხვაზე - არის თუ არა შესაძლებელი სახელმწიფო აუდიტის სამსახურის შესვლა გუბერნიებში და რომელიმე ყოფილ გუბერნატორზე სისხლის სამართლის საქმის აღძვრა? - სუბარმა ასე უპასუხა:

„ამ წუთში ამაზე ვერ გაგცემთ პასუხს, მაგრამ თუ სადმე რამე დარღვევა გამოვლინდა, მხოლოდ სახელმწიფო აუდიტი არა, იქ არსებობს საგამოძიებო ორგანოებიც და არავის არ ეპატიება რამე გადაცდომა, თუკი ასეთი რამე გამოვლინდა, მაგრამ ამ ეტაპზე ამაზე მე ვერ ვილაპარაკებ, ბუნებრივია. ეს არის სამართალდამცავი ორგანოების პრეროგატივა. იმ ადამიანების მიმართაც კი, რომლებიც ჩვენი გუნდის წევრებად რჩებიან, თუკი ასეთი კითხვები იარსებებს, ბუნებრივია, ყველას მოუწევს კითხვაზე პასუხის გაცემა. ეს არის ელემენტარული კანონი დემოკრატიის და სამართლიანობის, თუმცა ამ ეტაპზე ამაზე ამაზე არ ვლაპარაკობთ. ამ ეტაპზე ვლაპარაკობთ ჩვენს სამომავლო გეგმებზე - სამომავლო გეგმებზე, რომელიც არის ძალიან ამბიციური“.

სუბარმა აღნიშნა, რომ ძველი გუბერნატორების ნაწილი მათი გუნდის წევრებად რჩება, ნაწილი კი კერძო სექტორში გადაინაცვლებს.