განათლების ხარისხის განვითარების ეროვნული ცენტრის ხელმძღვანელმა, თამარ სანიკიძემ განაცხადა, რომ შავი ზღვის უნივერსიტეტის ადმინისტრაციის განცხადებას არ ეთანხმება. სანიკიძის თქმით, შავი ზღვის უნივერსიტეტი არ იხდის ბიუჯეტში გადასახდელ თანხას და მის მეწილეებს წილები დაყადაღებული აქვთ. სანიკიძემ ასევე აღნიშნა, რომ აბიტურიენტები, რომლებმაც შავი ზღვის უნივერსიტეტი აირჩიეს სხვა ავტორიზებულ უნივერსიტეტში გადანაწილდებიან.

„ვერ დავეთანხმები ვერანაირად ამ განცხადებას უნივერსიტეტის მხრიდან, იმიტომ რომ მე ვფიქრობ, რომ საბჭომ მაქსიმუმი გააკეთა იმისთვის, რომ მიეღო კანონიერი გადაწყვეტილება, რომელიც ასევე ოპტიმალური იქნებოდა თავის მხრივ უნივერსიტეტისთვისაც. მათ უკვე რამდენიმე წელია დავა აქვთ სახელმწიფოსთან იმ თანხასთან დაკავშირებით, რომლის გადახდაც ეკუთვნით სახელმწიფო ბიუჯეტში. მათი ქონებრივი მდგომარეობა, რომ შევამოწმოთ სრულად არის დაყადაღებული ყველა უძრავი, მოძრავი ქონება და შპს-ს მფლობელების წილები ამავდროულად. მე წარმოუდგენლად მიმაჩნია, ჩვენ არ გვქონია ასეთი შემთხვევა, რომ რომელიმე დაწესებულებას მსგავსი პრობლემა ჰქონოდეს, განგვეხილა და ასე ვთქვათ, დადებითი გადაწყვეტილება ყოფილიყო.

არსებულ სტუდენტებს არანაირი პრობლემა არ აქვთ, ისინი ჩვეულ რეჟიმში გააგრძელებენ სწავლას, შეზღუდვა ეხება იმ აბიტურიენტებს, ვინც წელს ეროვნულ გამოცდების შედეგად აირჩიეს შავი ზღვის უნივერსიტეტი, წელს მათ შევთავაზებთ სხვა ავტორიზებულ დაწესებულებებს, რომ გადანაწილდნენ და შეუფერხებლად დაიწყონ სასწავლო წელი“, განაცხადა თამარ სანიკიძემ.