გერმანიის კანცლერის, ანგელა მერკელის სომხეთში ვიზიტს ეხმაურება პოლიტოლოგი გია ნოდია, რომელიც „ფეისბუქზე“ მის მიერ გაზიარებული ვიდეოს კომენტირებისას ამბობს, რომ მერკელისადმი სომხეთის ხელისუფლებისა და სომეხი ხალხის დახვედრა „ადრეული მიშას [სააკაშვილის] რომანტიკული დემოკრატიის განწყობას გვაგონებს“, ხოლო საქართველომ კი კანცლერთან თავი მოიწონა „ღვინით, ხალხური სიმღერებით - როგორც საბჭოთა დროს“.

ეს ვიდეო აჩვენებს, რომ ამ ეტაპზე ჩვენ დავკარგეთ რეგიონში „დემოკრატიის შუქურის“ სტატუსი და დავუთმეთ სომხეთს. ყოველთვის შეიძლება თქმა, რომ „ეს ყველაფერი პიარია“, მაგრამ ქუჩაში ხალხის განწყობას ვერ დადგამ. ის ადრეული მიშას რომანტიკული დემოკრატიის განწყობას გვაგონებს. ფაშინიანს აქვს თაფლობის თვე სომეხ ხალხთან, ეს ამ ეტაპზე მისი ყველაზე დიდი წარმატებაა და ევროპის ყველაზე გავლენიანი ლიდერისთვის ამის დემონსტრირება უნდოდა. გამოუვიდა კიდეც.

რომ შევადაროთ, საქართველომ რით მოიწონა თავის მერკელთან? ღვინით, ხალხური სიმღერებით - როგორც საბჭოთა დროს. ხომ, კიდევ სტუდენტებით - ეს ვიზიტის ყველაზე წარმატებული ნაწილი აღმოჩნდა (არა მხოლოდ და არა ძირითადად იმიტომ, რომ სწორედ სტუდენტმა ამოათქმევინა მერკელს სიტყვა „ოკუპაცია“).

სომხეთში ეს თაფლობის თვე რამდენ ხანს გაგრძელდება, დემოკრატია ინსტიტუციურად გამყარდება თუ არა: ეს შეკითხვები შეგვიძლია დავსვათ. მე იმას ვამბობ, ახლა რა ეტაპზე ვართ“, წერს გია ნოდია.