შავი ზღვის საერთაშორისო უნივერსიტეტის რექტორმა,  ილიას ჩილოღლუმ განათლების ხარისხის განვითარების ეროვნულ ცენტრს წერილით მიმართა, რომლითაც სტუდენტების მიღებასთან დაკავშირებით უნივერსიტეტისთვის დაწესებული 1 წლიანი შეზღუდვის გადაწყვეტილების გადახედვას მოითხოვს.

ჩილოღლუმ განაცხადა, რომ განათლების ხარისხის განვითარების ეროვნულ ცენტრი პროცესს აჭიანურებს, რადგან აბიტურიენტებს უნივერსიტეტის შეცვლის ბოლო დღე, დღეს აქვთ და თუ ცენტრი გადაწყვეტილებას დღეს არ მიიღებს უნივერსიტეტს სტუდენტების მიღება გაუჭირდება.

„დავალიანება უკვე გადავიხადეთ. ცენტრისგან ვითხოვთ, რომ ჩვენს მდგომარეობას გადახედონ და ერთხელ კიდევ შეისწავლონ, ვინაიდან დღეს აბიტურიენტების მიერ არჩევანის გაკეთების ბოლო დღეა და რომ არ დაზარალდნენ აბიტურიენტები, რომლებსაც შავი ზღვის უნივერსიტეტი აქვთ მითითებული. ისინი გველოდებიან, როგორი შედეგი იქნება. იმედი გვაქვს, ცენტრი ამას გაითვალისწინებს.

ამ პროცესს დრო მიაქვს და პირველკურსელების მიღება ძალიან ძნელი იქნება. ფაქტობრივად, უნივერსიტეტი მათ ვერ მიიღებს, რადგან დრო უკვე იწურება. ამიტომ გადავწყვიტეთ, ცენტრს მივმართოთ, ჩვენს საქმეს კიდევ ერთხელ გადახედოს და იმედი გვაქვს, გადახედავენ. განცხადება შეგვაქვს, რომ დავალიანება გადახდილია. დღეს 18 საათამდე აქვთ აბიტურიენტებს შეცვლის უფლება“, განაცხადა ილიას ჩილოღლუმ.

ავტორიზაციის საბჭომ შავი ზღვის საერთაშორისო უნივერსიტეტს სტუდენტების ახალი ნაკადის მიღება 20 აგვისტოს ერთი წლით შეუზღუდა.