სახელმწიფო უსაფრთხოების სამსახურის უფროსის პირველი მოადგილის თანამდებობიდან იოსებ გოგაშვილის წასვლა მამუკა არეშიძეს აფიქრებინებს, რომ პრემიერ მინისტრი მამუკა ბახტაძე ცდილობს მოაწესრიგოს ის მდგომარეობა, რაც სახელისუფლებო ვერტიკალის გარეთ არსებული ინტერესებით მართულ გავლენიან ჯგუფებს უკავშირდება და როგორც ექსპერტი გაზეთ „კვირის პალიტრასთან“ საუბარში აცხადებს, „ეს არის პირების კატეგორია, რომლებსაც ხელი აქვთ გახსნილი და ქვეყნის მართვაში ყოველგვარი ლეგიტიმაციის გარეშე მონაწილეობენ“.

„რაც შეეხება უსაფრთხოების სახელმწიფო სამსახურის უფროსის მოადგილის სოსო გოგაშვილის თანამდებობიდან წასვლას - მისი გადადგომა მოსალოდნელი იყო და არა მგონია, კლანურ დაპირისპირებას გამოეწვია. არ გამოვრიცხავ, რომ უთანხმოება თავად უწყებაში იყო... მართლაც გაჩნდნენ გავლენიანი ჯგუფები, რომლებიც სახელისუფლებო ვერტიკალის გარეთ არსებული ინტერესებით იმართებიან და ეს ქვეყანას სერიოზულ პრობლემად ექცა. არის პირების კატეგორია, რომლებსაც ხელი აქვთ გახსნილი და ქვეყნის მართვაში ყოველგვარი ლეგიტიმაციის გარეშე მონაწილეობენ. ისეთი შთაბეჭდილება შემექმნა, რომ ახალგაზრდა პრემიერი ამ სიტუაციის მოწესრიგებას ცდილობს. ამის თქმის საფუძველს რამდენიმე საკადრო გადაადგილება მაძლევს, მათ შორის გოგაშვილის წასვლაც“, აცხადებს არეშიძე.