„ნაციონალურმა მოძრაობამ“ ფარული აუდიო ჩანაწერები გაავრცელა, რომელიც გრიგოლ ვაშაძის შტაბის წევრების განცხადებით, „ქართული ოცნების“ მიერ საპრეზიდენტო არჩევნების გაყალბებაზე მიანიშნებს.

აღნიშნულის შესახებ ბრიფინგი ცოტა ხნის წინ ლევან ბეჟაშვილმა გამართა.

„გაერთიანებული ოპოზიციის საარჩევნო შტაბმა, ბოლო პერიოდში, არაერთი მტკიცებულება წარმოადგინა, თუ როგორ გადააქცია ცენტრალური საარჩევნო კომისიის თავმჯდომარემ, ქალბატონმა ჟვანიამ საარჩევნო ადმინისტრაცია „ქართული ოცნების" საარჩევნო შტაბად. უპრეცედენტოდ დაბალი რეიტინგის ფონზე, საარჩევნო ადმინისტრაცია პირდაპირ უხეშად თანამშრომლობს „ქართული ოცნების" საარჩევნო შტაბთან და პირდაპირ მათი დირექტივებით მოქმედებს. ჩანაწერებში საუბარი არის, რომ კრწანისის საოლქო საარჩევნო კომისიის თავმჯდომარე პირდაპირ კონტაქტზე არის „ქართული ოცნების" საარჩევნო შტაბის კრწანისის საუბნო კომისიების კურატორთან, ქალბატონ ნინო მაისურაძესთან. ასევე, საუბარი არის ჩანაწერებში, რომ მათ აქტიური თანამშრომლობა აქვთ ალეკო ცხოვრებაძესთან, თბილისის „ოცნების" შტაბის კომისიების კოორდინატორი....

კიდევ ერთხელ, უნდა მოვუწოდოთ ცენტრალურ საარჩევნო კომისიის თავმჯდომარეს, თამარ ჟვანიას, თუკი რაიმე რეპუტაციული ინტერესი მას გააჩნია, პირდაპირ უნდა გადადგეს თანამდებობიდან, დადგეს პირდაპირ კრწანისის საოლქო კომისიის თავმჯდომარის პასუხისმგებლობის საკითხი და უნდა მოვუწოდოთ ყველა საოლქო საარჩევნო კომისიას, რომ არ დაუშვან შემდგომი 2-3 დღის განმავლობაში, როდესაც მოხდება შესაბამისი პროცედურების გავლა, „ქართული ოცნების" საარჩევნო შტაბიდან მოწოდებული სიებით საუბნო კომისიის წევრების არჩევა", განაცხადა ლევან ბეჟაშვილმა ბრიფინგზე.