„ერთიანი ნაციონალური მოძრაობის“ პოლიტიკური საბჭოს თავმჯდომარე ნიკა მელია საპრეზიდენტო არჩევნებში ოპოზიციის გამარჯვების კვალდაკვალ ვადამდელი საპარლამენტო არჩევნების ჩატარებისა და აღმასრულებელი ხელისუფლების მთლიანად შეცვლის აუცილებლობაზე საუბრობს. „ძალა ერთობაშია“-ს საპრეზიდენტო კანდიდატ გრიგოლ ვაშაძესთან ერთად სოფელ მუხრანში, აგრარულ ბაზარში მოვაჭრეებთან გამართული შეხვედრის შემდეგ, მელიამ ასევე ქვეყანაში არსებულ „ტოტალურ სიღარიბესა და ტოტალურ უმუშევრობაზე“ ისაუბრა.

„ყოველი მეორე, აგრარულ ბაზარში დასაქმებული ადამიანი, საუბრობს ერთი და იგივეს, რომ ვერ ახდენენ რეალიზაციას საკუთარი პროდუქციის. არა მარტო მუხრანის აგრარულ ბაზარში, ტოტალური სიღარიბეა ხალხნო, ტოტალური უმუშევრობაა. ერთადერთი გამოსავალი არის, რომ მიმდინარე საპრეზიდენტო არჩევნებზე დამარცხდეს ხელისუფლება, თუ ამას ხელისუფლება ჰქვია - გაურკვეველია, რომელი და ვისი კანდიდატით გამოდიან. ფაქტია, რომ ესენი უნდა დამარცხდნენ და მალევე უნდა მოყვეს ვადამდელი საპარლამენტო არჩევნები, რათა მთლიანად აღმასრულებელი ხელისუფლება შეიცვალოს იმ ადამიანებით, ვინც მართლა გააკეთებენ საქმეს“, განაცხადა მელიამ.