საქართველოს პრეზიდენტობის დამოუკიდებელი კანდიდატის, სალომე ზურაბიშვილის განცხადებით, მისი საარჩევნო კამპანია, ამ ეტაპზე, მისივე დანაზოგით ფინანსდება.

როგორც ზურაბიშვილმა ჟურნალისტებს უთხრა, საჯაროდ განაცხადებს, თუ ვინ იქნებიან მისი ფონდის დამფინანსებლები და იქნებიან თუ არა ძმები გაჩეჩილაძეები მათ შორის.

„არავინ არის ჩართული იმ მხრივ, რომ ჩემი საარჩევნო ფონდი ახლახან შეიქმნა, მე ვარ ჯერჯერობით ერთადერთი დამფინანსებელი ამ ფონდში, ჩემი პირადი დანაზოგით. ვინ იქნება ხვალ და, როცა იქნება ამას ძალიან საჯაროდ ვიტყვი, არაფერი დასამალი არ არის. თუ იქნებიან გაჩეჩილაძეები მივესალმები, თუ იქნებიან სხვები ამასაც მივესალმები. რაც შეიძლება ბევრნი იყვნენ და ბევრს მივესალმები", განაცხადა საპრეზიდენტო კანდიდატმა.

მანვე თქვა, რომ უახლოეს პერიოდში „ქართული ოცნების" თავმჯდომარეს, ბიძინა ივანიშვილსაც შეხვდება.

„მე შევხვდები, როცა იქნება გადაწვეტილება „ოცნების", განაცხადა ზურაბიშვილმა და დასძინა, რომ მმართველი პოლიტიკური გუნდის მხარდაჭერის იმედი აქვს.

„სხვა ძალა ამ ქვეყანაში, რომელსაც შეუძლია ჩემი მხარდაჭერა, გარდა თვით მოსახლეობის, არის ის ძალა, რომელთან ერთადაც, მე ერთ დროს ვიბრძოდი, ვიბრძვი და რომელთანაც მაქვს ბევრი საერთო ღირებულება. მე არ ვარ ამ პარტიის წევრი, პარტიული არ ვარ, მე მგონი, რომ პრეზიდენტი არ უნდა იყოს და მიკვირს იმ კანდიდატების, რომლებიც ერთდროულად პარტიის თავმჯდომარეები არიან", აღნიშნა სალომე ზურაბიშვილმა.