საქართველს პრემიერ მინისტრი „ერთიანი ნაციონალური მოძრაობის" მიერ გავრცელებულ ფარულ აუდიოჩანაწერებს და გრიგოლ ვაშაძის შტაბის განცხადებას, რომ აღნიშნული „ქართული ოცნების“ მიერ საპრეზიდენტო არჩევნების გაყალბებაზე მიანიშნებს, უსაფუძვლო ბრალდებას უწოდებს.

როგორც მთავრობის ადმინისტრაციაში გამართულ ბრიფინგზე მამუკა ბახტაძემ განაცხადა, პოლიტიკური ოპონენტების აღნიშნულ ბრალდებებზე საუკეთესო პასუხი „ქართული ოცნების" ხელისუფლების პირობებში ჩატარებული უმაღლესი სტანდარტის არჩევნებია.

„ჩვენ არაერთხელ მოგვისმენია ჩვენი ზოგიერთი პოლიტიკური ოპონენტისგან მსგავსი უსაფუძვლო ბრალდებები. ყველაზე კარგი პასუხი ამ უსაფუძვლო ბრალდებებზე არის ის რეალურად ჩატარებული არჩევნები, რომლებიც ჩატარდა „ქართული ოცნების" ხელისუფლებაში ყოფნის პერიოდში, რომელიც შეფასდა უმაღლესი სტანდარტით და რა თქმა უნდა, ეს არის ჩვენი ამოცანა. რაც შეეხება იმ კადრებს, რომლებიც გამოქვეყნდა მედიაში, ბუნებრივია, მე ვიცი, რომ საარჩევნო კომისიამ მას უპასუხა და ნებისმიერ ასეთ გამოვლენას სჭირდება ძალიან კონკრეტული პასუხი. რაც შეეხება ჩვენს განწყობებსა და მიდგომებს, მთავრობის დღევანდელ სხდომაზე ძალიან მნიშვნელოვანი დადგენილება განიხილება, რომელიც შეეხება ზუსტად ისეთ საკითხებს, რომ ჩვენ გვქონდეს აბსოლუტური პრევენცია, რომ არ მოხდეს სხვადასხვა ტიპის რესურსის გამოყენება არჩევნებზე. ის პრინციპები, რომლებიც გაწერილია ამ დადგენილებაში, წარმოადგენს ჩვენი კომუნიკაციის საკითხს ჩვენს მთავარ საერთაშორისო პარტნიორებთან", განაცხადა მთავრობის მეთაურმა ბრიფინგზე.