ლენტეხის მერის, ბადრი ლიპარტელიანის განცხადებით, მუნიციპალიტეტის მასშტაბით 2018 წლის განმავლობაში მნიშვნელოვანი ინფრასტრუქტურული პროექტების განხორციელება იგეგმება.

(GUARDIAN.GE-ს ფოტო)

როგორც GUARDIAN.GE-ს ლიპარტელიანმა განუცხადა, დაგეგმილია დაბა ლენტეხის კეთილმოწყობა, მუნიციპალიტეტის სოფლებში სანიაღვრე არხებისა და გზების საყრდენი კედლების მოწყობა, ხიდების მშენებლობა და აღდგენა, სოფლებში - გვიმბრალასა და ხელედში წყლის სისტემების მოწესრიგება.

(ამაღლების ეკლესიამდე მისასვლელი ხელოვნური ბილიკის (კიბის) მოწყობა. GUARDIAN.GE-ს ფოტო)

„ოთხი ახალი პროექტი დაგვემატა წელს, თუმცა, ტენდერზე დადება დაგვიანდა, რადგან დაპროექტების პროცესები გაიწელა. ამჟამად, პროექტები გვაქვს, თანხაც მოვითხოვეთ და მივიღეთ ინფრასტრუქტურის სამინისტროდან. ეს არის დაბა ლენტეხის კეთილმოწყობა - ნახევარმილიონიანი პროექტია. ერთ-ერთი პროექტი ამ ოთხიდან, სანიაღვრე არხებისა და გზების საყრდენი კედლების მოწყობას გულისხმობს მუნიციპალიტეტის სოფლებში, ღირებულება 223 000 ლარია. არის ასევე წყლის პროექტი, რომელიც სოფლებში - ხელედსა და გვიმბრალაში წყლის სისტემების მოწესრიგებას ითვალისწინებს - გაკეთდება წყლის სათავე ნაგებობები და სამუშაოები დაქსელვამდე მივა. და ბოლოს, მეოთხე პროექტი ხიდების გაკეთებას გულისხმობს. აღნიშნული პროექტებიდან სოფელ ნანარისა და სოფელ ლესემის ხიდები და გვიმბრალასა და ხელედის წყლის პროექტები ტენდერზეა დადებული. რაც შეეხება დაბა ლენტეხის კეთილმოწყობასა და სოფლებში გზის საყრდენი კედლებისა და სანიაღვრე არხების გაკეთებას, დოკუმენტაციაზე ექსპერტიზის დასკვნას ველოდებით. ხიდების პროექტს მთის ფონდი გვიფინანსებს, ხოლო ყველა დანარჩენს რეგიონული განვითარების ფონდი”, განუცხადა GUARDIAN.GE-ს ბადრი ლიპარტელიანმა და მუნიციპალიტეტის მასშტაბით, ამჟამად მიმდინარე პროექტებზეც გაამახვილა ყურადღება.

(სოფელ ლესემის სტადიონი. GUARDIAN.GE-ს ფოტო) 

„დაბა ლენტეხში ქუჩების ასფალტირება - აღნიშნული პროექტის მიხედვით, მიმდინარეობს პატარ-პატარა ქუჩებთან ერთად, ეზოების, ჩიხების მოწესრიგება. დაბა ლენტეხში ხორციელდება აგრეთვე ამაღლების ეკლესიამდე მისასვლელი ხელოვნური ბილიკის (კიბის) მოწყობა.

(ლენტეხის მუზეუმის მაჩუბის მშენებლობა. GUARDIAN.GE-ს ფოტო) 

შესრულების პროცესშია მსხვილი პროექტი, რომელიც მუნიციპალიტეტში საბავშვო ბაღების სველი წერტილების მოწყობა-რეაბილიტაციას გულისხმობს. სამუშაოები მიმდინარეობს დაბა ლენტეხში, სოფლებში - ხელედში, ნაცულში, ჩიხარეშში, ჟახუნდერში, სასაშსა და თეკალში.

(დაბა ლენტეხში ქუჩების ასფალტირება. GUARDIAN.GE-ს ფოტო)

მნიშვნელოვანია პროექტია ასევე ლენტეხის მუზეუმის მაჩუბის მშენებლობა, რომელიც მიმდინარეობს. სოფლებში - ლესემაში, მელურაში, ყარიშში, საყდარში, ფანაგასა და შკედში სტადიონების მშენებლობის მეორე ფაზა მიმდინარეობს, რის შემდეგაც, სამუშაოები დასრულდება. ყველა ეს პროექტი რეგიონული განვითარების ფონდის დაფინანსებით ხორციელდება“, განუცხადა GUARDIAN.GE-ს ლენტეხის მუნიციპალიტეტის მერმა.