თბილისის მერი დედაქალაქის მთავრობის დღევანდელ სხდომაზე კუს ტბის მიმდებარე ტერიტორიაზე,  რესტორან „ოტიუმის“ წინ უკანონო მშენებლობის შეჩერებას გამოეხმაურა და აღნიშნა, რომ მშენებლობის ნებართვა რეკრეაციულ ზონაში იყო გაცემული და კახა კალაძის თქმით, მერიამ აღნიშნული ნებართვა გააბათილა.

კალაძის განცხადებით, მერია მიესალმება მშენებლობებსა და თბილისის განვითარებას, თუმცა, არა მწვანე სივრცეების ხარჯზე.

„გუშინ კუს ტბის მიმდებარე ტერიტორიაზე, რესტორან „ოტიუმის“ წინ დაიწყეს უკანონო მშენებლობა. დაფიქსირდა ფაქტი, ზარი შემოვიდა ზედამხედველობის სამსახურში და მაშინვე ჩვენი მხრიდან მაშინვე მოხდა რეაგირება და მშენებლობა შევაჩერეთ. არსებობს პრინციპები, რასაც არ უნდა გადავაბიჯოთ. ჩვენ ყველა ვთანხმდებით, რომ ქალაქში გვაქვს მწვანე სივრცეების პრობლემა. ბოლო 20 წლის განმავლობაში რაც ხდებოდა, ყვეალაფერი სახეზეა. ჩვენ მერიამ, მოსახლეომშებამ, დეველოპერებმა, ყველამ ერთიანი ძალისხმევით უნდა შევძლოთ ამ რეალობის გამოსწორება და მე დარწმუნებული ვარ, ამას აუცილებლად მოვახერხებთ. ეს კონკრეტული პროექტი იყო მწვანე სივრცეში. ფოტომასალაც არის გავრცელებული, თუ როგორ არის ამოგლეჯილი რეკრეაციულ ზონაში იყო მიცემული მშენებლობის უფლება. ჩვენი მხრიდან გაბათილებულ იქნა სამშენებლო ნებართვა. რა თქმა უნდა, არ უნდა დავაზარალოთ მეპატრონე, რომელიც არის კეთილსინდისიერი მყიდველი ამ ფართის და შესაბამისად, ცივილურ ფორმებში უნდა მოხდეს საქმის მოგვარება. კიდევ ერთხელ ვიმეორებთ, ჩვენ მივესალმებით მშენებლობას, ქალაქის განვითარებას, მაგრამ არავითარ შემთხვევაში, ეს არ უნდა მოხდეს მწვანე სივრცეებისა და რეკრეაციული ზონების ხარჯზე. გექნებათ მაქსიმალური მხარდაჭერა სამშენებლო სექტორს, რომ ერთად განვავითაროთ და ერთად ავაშენოთ ეს ქალაქი, მაგრამ ეს გავაკეთოთ მაქსიმალურად სწორად, რადგან ეკოლოგიური მდგომარეობა ქალაქში არის მძიმე. ერთიანი ძალისხმევით უნდა შევცვალოთ არსებული რეალობა და აუცილებლად შევცვლით“, აღნიშნა თბილისის მერმა მთავრობის სხდომაზე.