საქართველოს ყოფილი პრეზიდენტი მიხეილ სააკაშვილი საქართველოს საზღვრების დაცვისა და საიმიგრაციო პოლიტიკის გამკაცრების აუცილებლობაზე საუბრობს და ამბობს, რომ საქართველოს სჭირდება ისეთივე მკაცრი წესები როგორიც აქვს შვეიცარიას, ნიდერლანდებს და ბევრ სხვა ქვეყანას და „პირველ რიგში უნდა ვიზრუნოთ იმაზე, რომ საქართველოს არ ტოვებდნენ საქართველოს მოქალაქეები, ქართველები“ და ამის რეალიზებას იგი, ქვეყანაში ხელისუფლების შეცვლის შემდეგ აპირებს. 

„როდესაც იძახიან, რომ სააკაშვილმა საქართველოში შემოიყვანა უცხოელები, თურქები და ა.შ. ჩვენ ვაძლევდით საქართველოს მოქალაქეობას თურქეთის ქართველ მოქალაქეებს და თურქეთის მთავრობა ძალიან ნერვიულობდა მაშინ ამაზე, ყველაფერს აკეთებდნენ, რომ ეს არ გამეკეთებინა. იმიტომ რომ, ეს იყო ხალხი, ვინც ლაპარაკობს ქართულად, უყვარს საქართველო, აბანდებს ფულს საქართველოში და არის ჩვენი ლობი, მათ შორის თურქეთის ტერიტორიაზე. ახლა შემოდის სულ სხვა ხალხი. ახლა შემოდის ხალხი, რომელმაც არც ერთი სიტყვა ქართული არ იცის, რომელიც არც ერთ წარწერას ქართულად არ აკეთებს, რომელიც არ იცნობს ადგილობრივ ტრადიციებს და არც სცემს მათ პატივს“, ამბობს სააკაშვილი მის მიერ გავრცელებულ ვიდეომიმართვაში და განაგრძობს, რომ ამის პარალელურად საქართველოდან მასობრივად გადიან ქართველები.

„ჩემი პრეზიდენტობის დროს, თითქმის ყველა წელიწადს, საქართველოში მოსახლეობის რაოდენობა იზრდებოდა. ახლა 750 ათასი ადამიანით შემცირდა ქართველების რაოდენობა ბოლო 6 წლის განმავლობაში - 750 ათასით და საერთოდ უკონტროლოდ წავიდა მიგრაცია. ჩემთვის სრულიად უცხოა ყველანაირი ქსენოფობია. მე არ მივიღებ ხალხის დისკრიმინაციას ეროვნების, ეთნიკურობის თუ ენობრივი ნიშნის მიხედვით. ამავე დროს საქართველოს სჭირდება მკაცრი წესები და ისეთივე წესები, მაგალითად, როგორიც აქვს შვეიცარიას, როგორიც სულ უფრო მეტად შემოდის მაგალითად, აქ, ნიდერლანდებში და ბევრ სხვა ქვეყანაში. საქართველომ უნდა სცეს პატივი საკუთარ საზღვრებს. რა თქმა უნდა, ყველანაირად უნდა დავიცვათ ყველას უფლებები, მაგრამ პირველ რიგში უნდა ვიზრუნოთ იმაზე, რომ საქართველოს არ ტოვებდნენ საქართველოს მოქალაქეები, ქართველები. ამიტომ მე ვთხოვე ჩვენ ფრაქციას პარლამენტში, შეიტანონ კანონპროექტი პარლამენტში, მიუხედავად იმისა, რომ ჩვენ ძალიან ცოტა ხმები გვაქვს, მაგრამ სულ მალე ეს პარლამენტი შეიცვლება და კანონპროექტი უნდა იდოს - „საქართველოს საზღვრების დაცვის“ შესახებ. ჩვენ გვჭირდება კანონის უზენაესობა და სწრაფი ეროვნული განვითარება და ჩვენ ამას აუცილებლად მივაღწევთ“, აცხადებს სააკაშვილი, რომელიც ამავე ვიდეოში საქართველოში ტურიზმის განვითარების მიმართულებითაც კარდინალური ცვლილებების აუცილებლობაზეც საუბრობს.