ოპოზიციური გაერთიანება „ძალა ერთობაშია“-ს წევრი პარტიის, „საქართველო ლიდერთა შორის“ წარმომადგენელი მამუკა გამყრელიძე საზოგადოებრივ მაუწყებელთან აცხადებს, რომ გაერთიანების წარმომადგენელთა ნაწილს, გრიგოლ ვაშაძის ნომრად ბიულეტენში 1 სურდათ. 

მისი თქმით, საარჩევნო ნომრად 5-იანის არჩევაზე გადაწყვეტილება „ნაციონალურმა მოძრაობამ“ მიიღო და ამაზე შეთანხმება არ ყოფილა.

„მე და რამდენიმე ადამიანს გვერჩივნა ყოფილიყო ნომერი 1 ან ყოფილიყო 405, 693 ან ნებისმიერი 5-ის გარდა. ეს რაღაცნაირად ავიწროებს მუშაობის არეალს. ჩვენ გვინდა, ამომრჩევლის ფართო სპექტრზე გავიდეთ და არა მხოლოდ იმ ამომრჩეველზე, რომელიც „ნაციონალურ მოძრაობას“ ყავს. ნომერი 1 არის ნიკა მაჭუტაძის. უპირველეს ყოვლისა, ის ეწინააღმდეგებოდა 5 ნომერს. შემიძლია დაგიდასტუროთ, რომ ხარატიშვილიც ნომერ 1-ის მომხრე იყო, ნიკა ვაშაკიძეც. პაატა დავითაიაც ზუსტად იგივე აზრზეა, უბრალოდ მისი აზრის დაფიქსირების ხასიათი ორჭოფულია და კითხვებს ტოვებს. ზუსტად ამავე აზრზე იყო გიორგი ვაშაძე, აბსოლუტურად დარწმუნებული ვარ ამაში, უბრალოდ გიორგი ვაშაძე ასეთი რადიკალური და კატეგორიული არ არის თავის განცხადებებში. მან გააკეთა ფოკუს ჯგუფები, რომელმაც გამოავლინა, რომ პირველი ნომერი ჯობდა, დავიქირავეთ კომპანია, რომელმაც ჩაატარა გამოკითხვები. ფოკუს ჯგუფებმა აჩვენა, რომ ნომერი 1 ჯობდა, მაგრამ მაინც 5-იანზე დარჩნენ.

შეთანხმება არ ყოფილა. ეს გადაწყდა ერთპიროვნულად „ნაციონალური მოძრაობის“ მიერ. მე ძალიან გულდაწყვეტილი ვარ, მაგრამ მარტო გადაწყვეტილებას ვერ მივიღებ. ყველანი შევთანხმდებით, ჩამოვყალიბდებით და მერე ვილაპარაკოთ“, აცხადებს მამუკა გამყრელიძე.