მესამე პოლიტიკური ძალა „ქართული ოცნებიდან“ უნდა გამოიჩეკოს, მაგრამ ამგვარი პროცესის დასაწყისი ჯერ არ ჩანს, რადგან ბიძინა ივანიშვილის ფაქტორი კვლავაც რჩება მმართველი პარტიის გამაერთიანებლად, - მიიჩნევს პოლიტოლოგი რამაზ საყვარელიძე.

როგორც მან გაზეთ „კვირის პალიტრასთან“ საუბრისას თქვა, თუკი მესამე ძალა გამოჩნდება, მაშინ „ქართულ ოცნებას“ პრობლემები მართლაც შეექმნება.

„თუ გამოჩნდა რეალური მესამე ძალა, რომლის კონტურებიც კი, სამწუხაროდ, ჯერჯერობით არ ჩანს, მაშინ მართლაც შეექმნება პრობლემა „ქართულ ოცნებას“, რომელსაც მხარდამჭერები კი არ ჰყავს, არამედ მისი ამომრჩევლის უმრავლესობა ის ხალხია, ვისაც „ნაციონალური მოძრაობა“, თავისი განაყოფით, არ დაენახვება თვალით. საიდან შეიძლება გამოჩნდეს ეს მესამე ძალა - ახალი ოპოზიცია? ისევ და ისევ „ქართული ოცნებიდან“ უნდა გამოიჩეკოს, რაც ახასიათებს ქართულ პოლიტიკას, მაგრამ ამგვარი პროცესის დასაწყისი ჯერ არ ჩანს. ბიძინა ივანიშვილის ფაქტორი კვლავაც რჩება ამ პარტიის გამაერთიანებლად“, აცხადებს რამაზ საყვარელიძე.