მმართველი გუნდის დეპუტატი და ხორავას ქუჩაზე მომხდარი მკვლელობის საქმეზე შექმნილი საპარლამენტო საგამოძიებო კომისიის წევრი, ეკა ბესელია ოპონენტების მოთხოვნებს შინაგან საქმეთა და იუსტიციის მინისტრების გადადგომის შესახებ არ იზიარებს და აცხადებს, რომ გიორგი გახარიას უპასუხისმგებლო ქმედებები არ იკვეთება, ხოლო წულუკიანისთვის  პასუხისმგებლობის დაკისრება აბსურდულია, რადგან მან მარტო საჯარო განცხადება გააკეთა ირაკლი შოთაძის გადადგომასთან დაკავშირებით.

„ამდენი ხნის - სამი თვის შემდეგ, ისეთი აღმოჩენა რა გავაკეთეთ, გარდა პოლიტიკური შეფასებისა და პოლიტიკური იერიშისა, რაც გამოძიებამ იმ მოკლე შემჭიდროვებულ ვადაში არ გააკეთა და ვერ გააკეთა. რა კავშირშია ეს პასუხისმგებლობა გახარიას განცხადებასთან? რა ჩაკეტა, ბატონო სერგი, გახარიას განცხადებამ დეკემბერში, როდესაც მისი განცხადების შემდეგ 500-მდე საგამოძიებო და საპროცესო მოქმედება ტარდება. ეს არის ლოგიკა? ეს დავადგინეთ და აქამდე მივედით, რომ წულუკიანს იმიტომ უნდა დავაკისროთ პოლიტიკური პასუხისმგებლობა, რატომ გააკეთა საჯარო განცხადება, კომისიაზე მოგყავთ და კითხვას არ უსმევთ არანაირ კონტექსტში, ერთადერთი ჰკითხეთ, განცხადებას ეთანხმება თუ არა. ეს არის პასუხისმგებლობის არსი, ეს არის დასაბუთებული, არგუმენტირებული, წონადი არგუმენტები?“, განაცხადა ეკა ბესელიამ.

ეკა ბესელიამ ასევე ოთარ კახიძეს მიმართა კითხვით თუ რა კვალიფიკაციას მისცემდა ვანო მერაბიშვილის საქმეს თუ სხვა როლიდან დააკვირდებოდა იმ პროცესს, როცა მერაბიშვილი ამბობდა - ‘ორი გვამი მინდაო’.

„განცხადებების გამო რომ პირთა პასუხისმგებლობის საკითხების დაყენებას ითხოვთ, აი, თქვენ რომ ახლა იხილავდეთ, მაგალითად სხვა როლიდან, ვანო მერაბიშვილის მიერ გაკეთებულ განცხადებებს და ამას აფასებდეთ ამ პოლიტიკურ ჭრილში და არა იმისთვის, რისთვისაც გასამართლებულია, ორი გვამი მინდაო რომ იძახდა, ასეთი განცხადებისთვის რა კვალიფიკაციას მისცემდით, ბატონო ოთარ, სხვა როლიდან რომ უყურებდეთ ამ პროცესს. თქვენ ხომ განცხადებების გამო ასამართლებთ ამ ადამიანებს და პასუხისმგებლობას ითხოვთ, ასეთი განცხადებებისთვის რა ტიპის პოლიტიკურ სასჯელს მოიფიქრებდით, იქნებ ესეც იმ პასუხებში მიაყოლოთ და ესეც გვითხრათ, მე სხვა პოლიტიკური არგუმენტი ასეთ ჩამონათვალზე არ და ვერ მექნება“, განაცხადა ეკა ბესელიამ.