რუსი ჟურნალისტებისა და ექსპერტების მონაწილეობით თბილისში მიმდინარე მედიაფორუმს ეხმაურება საქართველოს პარლამენტის თავმჯდომარის მოადგილე, „ქართული ოცნების“ ჩუღურეთის რაიონის მაჟორიტარი დეპუტატი გიორგი ვოლსკი, რომელიც მიიჩნევს, რომ რუსებს არ გააჩნიათ რაიმე რესურსი იმისათვის, რომ „ჩვენს საზოგადოებას ტვინი გამოურეცხონ და სხვანაირად აფიქრებინონ“.

„მე არა მგონია, რომ მათ რაიმე რესურსი გააჩნიათ იმისათვის, რათა ჩვენს საზოგადოებას ტვინი გამოურეცხონ და სხვანაირად აფიქრებინონ ან რაიმე სიახლეს წარმოადგენს მათი პოზიცია. ერთადერთი ვისაც რაიმე რაღაცა პოლიტიკური სარგებელი შეიძლება ჰქონდეს ამ ჩამოსვლიდან და ამ სკანდალური შეკითხვებიდან და პასუხებიდან, ეს არის „ნაციონალური მოძრაობა“. ისიც არა მგონია, რომ დიდად გაიმარჯვოს რაღაც რუსული პროპაგანდის თემის წამოწევაში, ვინაიდან, რუსული პროპაგანდა არსებობს ტელევიზიებითაც. რომ არ ჩამოსულიყვნენ, ჩვენ ზუსტად ვიცით რა პოზიცია აქვთ მათ“, განაცხადა გიორგი ვოლსკიმ.