„პატრიოტთა ალიანსის“ დეპუტატი ირმა ინაშვილი საპარლამენტო უმრავლესობას მოუწოდებს, მხარი დაუჭირონ მათ რეზოლუციას, რომელიც დეპუტატის თქმით, ითვალისწინებს 2004-2012 წლების სააკაშვილ-ბოკერიების დანაშაულებრივ მმართველობისა და რეჟიმისთვის სამართლებრივ-პოლიტიკური შეფასების მიცემას. აღნიშნულ საკითხზე ირმა ინაშვილმა დღევანდელ პლენარულ სესიაზე ისაუბრა. ის ასევე ამბობს, რომ როცა სააკაშვილის და მისი თანამებრძოლების  დანაშაულში მონაწილეობა დადგენილია, რატომ არ უნდა დაისაჯონ დამნაშავეები. ინაშვილი პარლამენტის თავმჯდომარისგან ამ პროცესში განსაკუთრებულ თანამონაწილეობას და ყურადღებას, ასევე შეხვედრას ითხოვს.

„პარლამენტში „საქართველოს პატრიოტების“ რეზოლუციაა შემოსული, რომელიც ითვალისწინებს 2004-2012 წლების სააკაშვილ-ბოკერიების დანაშაულებრივ მმართველობისა და რეჟიმისთვის სამართლებრივ-პოლიტიკური შეფასების მიცემას. პარლამენტს წინა წლებში მიღებული აქვთ დადგენილება და ქვეყანაში პოლიტპატიმრების არსებობა დადასტურებული აქვს. სწორედ ამ პარლამენტმა დაადასტურა, რომ 200-ზე მეტი პოლიტპატიმარი გვყავს. ასევე, პარლამენტმა სპეციალური დადგენილებით ქვეყანაში წამების ფაქტები დაადასტურა და ამ დადგენილებაში მკაფიოდ აღნიშნა, რომ წამების ფაქტებს ორგანიზებას მაღალი პოლიტიკური თანამდებობის პირები უწევდნენ.

ახლა მე თქვენ, „ქართული ოცნების“ საკონსტიტუციო უმრავლესობას გეკითხებით – ეს დადგენილებები სახეზე გვაქვს, თუ პოლიტპატიმრები არსებობდნენ, თუ წამების ფაქტებს ორგანიზებული ხასიათი ჰქონდა და ეს სისტემური დანაშაული იყო, რაც პარლამენტმა დაადასტურა, მაშინ დამნაშავეები რატომ არ უნდა დაისაჯონ და ფიგურანტები რატომ არ უნდა გამოიკვეთონ. თუ თქვენ გინდათ მუდმივ რეჟიმში გვაყურებინოთ თქვენ და ბოკერიები ერთმანეთს როგორ ეჟღურტულებით. ძალიან გთხოვთ, ეს მარაზმი დაასრულეთ.

საკონსტიტუციო უმრავლესობას მოვუწოდებ, სახელმწიფოებრივი და ეროვნული ინტერესებიდან გამომდინარე იხელმძღვანელეთ, ჩვენს რეზოლუციას მხარი დაუჭირეთ. ვიცი, რომ ერთი მზაკვრობა გაქვთ ჩაფიქრებული. გინდათ ეს რეზოლუცია დროში გაწელოთ და მერე საზოგადოებას დაავიწყოთ. როგორც მანამდე გვეუბნებოდით, წარსული დაივიწყეთ, დამნაშავეებს ჩაეხუტეთ, მერე გვითხრათ, რომ ეს რეზოლუცია არავის ახსოვს.

ამ პლენარული სხდომის ფარგლებში მინდა შეხვედრა გთხოვოთ.  შევხვდეთ და ეს საკითხები გავიაროთ, რადგან ისე თათბირს და შეხვედრას თქვენ ვიცე-სპიკერებთან არ მართავთ. ალბათ ბოკერიასთან მართავთ და ჩემთან არა. მოგიწოდებთ, იმ ათასობით ადამიანის განწყობა გაითვალისწინოთ, რომელმაც ხელი ამ რეზოლუციას უკვე მოაწერა.

თუ თქვენ ამას არ გააკეთებთ ეს ქართული სახელმწიფოსთვის ძალიან მძიმე დარტყმა იქნება. მე ქართული სახელმწიფოს და ჩვენი შვილების მომავალი მადარდებს და არა თქვენი პარტიის საკონსტიტუციო უმრავლესობა. ჩვენ ამ ქვეყანაში ის მარაზმი უნდა დავასრულოთ, როცა მწამებლები მკვლელობის საქმეს იძიებენ“, აღნიშნა ირმა ინაშვილმა სხდომაზე.