ზაზა სარალიძემ დღეს გამართულ პრესკონფერენციაზე განაცხადა, რომ ხორავას ქუჩაზე მომხდარი მკვლელობის საქმეზე „ქართული ოცნების“ მიერ წარმოდგენილი დასკვნა სამარცხვინოა და მმართველი პარტიის მაღალჩინოსნები „პირდაპირ ხელს უშლიან მისი შვილის მკვლელის გამოაშკარავებას“.

„ვერ მივიღე პასუხი თუ ვინ არის ჩემი შვილის მკვლელი, რომელიც „ქართულმა ოცნებამ“ წარმოაჩინა ისე, რომ თითქოს მე ვინტერესდებოდი მხოლოდ და მხოლოდ - ვინ დაანგრია ფარდული, ვინ გაღუნა დანა და რატომ მფარველობენ სუბელიანს. სამარცხვინოა, სამარცხვინოა მათი დასკვნა. ეს არც კი უნდა გაეფიქრებინათ იქიდან გამომდინარე, რომ აქ არის ყველაზე მთავარი მიზანი და მიზეზი. ვინ მოკლა დავით სარალიძე და არა, ვინ გაღუნა დანა. ვინ გაღუნა დანა, ისიც დამნაშავეა იქიდან გამომდინარე, რომ ხელი შეუშალა მკვლელის დადგენას. ვინც დაანგრია ფარდული, პირდაპირ მნიშვნელობაშია და ხელი შეუშალა ჩემი შვილის მკვლელის დადგენას; მირზა სუბელიანის მოქმედებებმა პირდაპირ ხელი შეუშალა ჩემი შვილის მკვლელობის გამოძიებას და ჩვენ დღეს ვღებულობთ იმას, რომ „ქართული ოცნების“ მაღალჩინოსნები პირდაპირ ხელს უშლიან ჩემი შვილის მკვლელის გამოაშკარავებას“, განაცხადა ზაზა სარალიძემ და დასძინა, რომ 10 სექტემბრიდან კვლავ აქციების დაწყებას გეგმავს.