თბილისის საქალაქო სასამართლოში ბარნოვის ქუჩაზე 13 აპრილს მოკლული 25 წლის თამარ გამრეკელაშვილის საქმის განხილვა ხმაურით დაიწყო. სასამართლოს დერეფანში ერთმანეთს მკვლელობაში ბრალდებული ვეფხია ბაქრაძის შვილი და მოკლულის დედა სიტყვიერად და ფიზიკურად დაუპირისპირდნენ. სიტუაცია მას შემდეგ განიმუხტა, რაც დაპირისპირებული მხარეები მანდატურმა გააშველა.

დაპირისპირების დაწყებას წინ მკვლელობაში ბრალდებულის შვილის, ლიკა ბაქრაძის განცხადება უძღოდა.

ბაქრაძემ გამრეკელაშვილის სიკვდილში მოკლულის დედა, ნათია გობაძეც დაადანაშაულა.

„შვილის მკვლელი ხარ, შვილი მოკალი და მეც მომკალი", ასე მიმართა მან მოკლული თამარ გამრეკელაშვილის დედას.

მოგვიანებით კი, ლიკა ბაქრაძემ ჟურნალისტებთან ასეთი განცხადება გააკეთა:

„მე ვუთხარი, რომ მარტო შვილი კი არ მომკალი-მეთქი, მეც მომკალი-მეთქი. თავისი ბრალი რომ არის ეს ყველაფერი, ვერ ხვდება? ცოლს რატომ უწოდებთ? ცოლი იმიტომ გახდა, რომ თვითონ უნდოდა და თავისი სურვილი იყო".

რაც შეეხება გარდაცვლილის დედას, დაპირისპირების შემდეგ იგი სასამართლოს შენობიდან გაიყვანეს.

„როგორ მოვიდა ჩემთან, ჩემი შვილის სისხლით აქვთ ხელები გასვრილი, შვილი მომიკლეს", განაცხადა ნათია გობაძემ.

13 აპრილს, თბილისში, ბარნოვის ქუჩაზე 25 წლის თამარ გამრეკელაშვილს ორი მცირეწლოვანი შვილის თვალწინ, ყელი გამოჭრეს. მომხდართან დაკავშირებით შსს-მ 14 აპრილს, მოკლულის მამინაცვალი, ვეფხია ბაქრაძე თელეთში დააკავა.

გამოძიება 11 პრიმა 109–ე მუხლით მიმდინარეობს, რაც ოჯახში ძალადობის ნიადაგზე ჩადენილ განძრახ მკვლელობას დამამძიმებელ გარემოებაში გულისხმობს. აღნიშნული მუხლი 16–დან 20 წლამდე ან უვადო პატიმრობას ითვალისწინებს.