მამუკა ბახტაძე თბილისში გამართულ რუსეთის მხრიდან დაფინანსებულ მედია ფორუმს გამოეხმაურა და მას რუსეთიდან წამოსული „რბილი ძალა“ და პროპაგანდა უწოდა. პრემიერ მინისტრის თქმით, ეს პროპაგანდა დგას სხვა ქვეყნებშიც და საქართველოს უკვე არჩეული აქვს საკუთარი გზა და მსგავსი პროპაგანდა ნეგატიურად ვერ აისახება მოსახლეობაზე.

„რაც შეეხება „რბილ ძალას“ და პროპაგანდას, რომელიც რუსეთიდან მოდის, ვფიქრობ, რომ ეს არ არის გამოწვევა მხოლოდ საქართველოსთვის, ეს არის გამოწვევა მთელი დასავლეთისთვის და ევროპული ცივილიზაციისთვის. აქედან გამომდინარე, ჩვენ ვთვლით, რომ ეს არის გამოწვევა, მაგრამ აქვე არ შემიძლია არ აღინიშნოს, რომ ქართულმა საზოგადოებამ თავისი გადაწყვეტილება და თავისი პოზიცია დიდი ხანია დააფიქსირა. ეს არ არის მხოლოდ პოლიტიკური და გეოპოლიტიკური გადაწყვეტილება, ეს არის ჩვენი არჩევანი, რომ საქართველო აუცილებლად უნდა დაუბრუნდეს ევროპულ ოჯახს. ჩვენ აუცილებლად უნდა გვქონდეს შესაბამისი ეფექტური მექანიზმი, რომ არ დავუშვათ საქართველოში ისეთი პროპაგანდა, რომელიც შესაძლოა აისახოს ნეგატიურად მოსახლეობაზე, თუმცა დარწმუნებული ვარ, რომ ეს არ მოხდება“, განაცხადა ბახტაძემ.