ტელეკომპანია „იბერია“ მეორე დღეა მაუწყებლობის საგანგებო რეჟიმზე გადავიდა. არხის თანამშრომლები ხელისუფლებას ზეწოლასა და ტელევიზიის დახურვის მცდელობაში ადანაშაულებენ. 

როგორც „იბერიას“ ტელეწამყვანი არჩილ გამზარდია აცხადებს, ტელევიზიის მიმართ არსებული პრობლემის მოგვარება შესაძლებელია, თუმცა, ამისთვის პოლიტიკური ნება არ არსებობს.

„არსებობენ კომპანიები, ეთიკური თვალსაზრისით არ დავასახელებ, რომლებსაც ასეულობით მილიონი ლარი აქვს ვალი სახელმწიფოსთვის და ისინი ამ ვალს რესტრუქტურიზაციის პირობებში იხდიან, ვისთანაც „ქართულ ოცნებას“ ამის ნება გააჩნია, ჩვენს  შემთხვევაში, როგორც  ჩანს ნება არ გააჩნია ანუ აღარ ვეხები იმ მაფიოზურ თემას, რომელიც გულისხმობდა ტელევიზიის სანაცვლოდ პრობლემების მოგვარებას ანუ პრობლემა მოგვარებადია, როგორც ჩანს თუ კი ტელევიზიას წაიღებენ „ქართული ოცნების“ განსაზღვრული პირები, შესაბამისად რაკიღა პრობლემა მოგვარებადია, მოდით, ვკონცენტრირდეთ ამაზე, არაფერი რთული არ იქნება იმაში, რომ „ქართულმა ოცნებამ“ „ახევების“ მოწადინებას თავი დაანებოს და დადგეს, სავალდებულო, კანონიერი გადანაწილება მოახდინოს“, განაცხადა არჩილ გამზარდიამ.