გიორგი კვირიკაშვილის მთავრობის კიდევ ერთი მინისტრი შესაძლოა პროკურატურაში დაიბარონ. ყოფილი საგარეო საქმეთა მინისტრის, მიხეილ ჯანელიძის გამოკითხვაზე დაბარების მიზეზი მოქმედი საგარეო საქმეთა მინისტრის მოადგილის, ვატო მახარობლიშვილის ძმის ავთანდილ მახარობლიშვილის კომპანიისთვის მილიონობით ლარის გადარიცხვა შეიძლება გახდეს.

„კურიერის“ ინფორმაციით, მიხეილ ჯანელიძის წინააღმდეგ სამართლებრივი დევნის დაწყების მიზეზი შეიძლება გახდეს, ლეონიძის 3 ნომერში საგარეო უწყების ჯერ არ დამთავრებული შენობა, რომელიც ბიუჯეტს უკვე, დაახლოებით, 20 მილიონი ლარი დაუჯდა.

ტენდერის გარეშე, გამარტივებული წესით გაფორმებული ხელშეკრულებების ნაწილი არასამთავრობო ორგანიზაციის ყურადღების ცენტრში კორუფციის რისკების გამო აღმოჩნდა.

„ინფორმაციის თავისუფლების განვითარების ინსტიტუტის“ მიერ გაშიფრული სქემის მიხედვით, პრემიერმა გიორგი კვირიკაშვილმა მიხეილ ჯანელიძეს სამინისტროს ახალი შენობის რემონტის დაწყებამდე საპროექტო სამუშაოებისთვის 737 ათასი ლარი გამოუყო. სამინისტრომ მეორე დღესვე ტენდერის გამოცხადების გარეშე, ხელშეკრულება ერთი დღის დაფუძნებულ კომპანია „ლენდ მარკ პროჯექტს“ გაუფორმა, რომლის 100-პროცენტიანი წილის მფლობელი საგარეო საქმეთა მინისტრის მოადგილის, ვატო მახარობლიშვილის ძმა, ავთანდილ მახარობლიშვილია.

აუდიტის სამსახური საგარეო საქმეთა სამინისტროს შემოწმების დოკუმენტს რამდენიმე კვირაში გამოაქვეყნებს. აუდიტორებმა რამდენიმე მნიშვნელოვანი დარღვევა გამოავლინეს. მიხეილ ჯანელიძესთან კითხები, შესაძლოა სამართალდამცველებს ჰქონდეთ.