გაერთიანებული ოპოზიციის, „ძალა ერთობაშია“-ს საპრეზიდენტო კანდიდატი გრიგოლ ვაშაძე „ქართული ოცნების“ გადაწყვეტილებას ეხმაურება. ვაშაძის თქმით, ამ გადაწყვეტილებით ქართველი ხალხი დაკარგავს დემოკრატიისადმი ყოველგვარ ნდობას, ზურაბიშვილის გამოჩენა კი საერთაშორისო არენაზე მოსპობს საქართველოს რეპუტაციას.

„საკითხი იმაშია, რას მისცემს ის ქართველ ხალხს და მე თქვენ გეტყვით, ეს რას მისცემს ქართველ ხალხს. ეს მისცემს დემოკრატიისადმი ყოველგვარი ნდობის დაკარგვას, ეს მისცემს იმას, რომ ხალხი სულ უფრო უნდობლობით შეხედავს პოლიტიკურ კლასს და სახელმწიფო ინსტიტუციებს და ჩვენი მოკავშირეები სულ უფრო უნდობლობით უყურებენ საქართველოში დემოკრატიის ხარისხს, ეს არის ტრაგედია.

სხვა სიტუაციაში ალბათ, მანდილოსანზე ვერ და არ ვილაპარაკებდი, მაგრამ პოეზიის არ იყოს პოლიტიკაში, რომ შემოდიხარ სქესი აღარ გაქვს უკვე და მინდა ვთქვა, რომ სალომე ზურაბიშვილის საგარეო პოლიტიკა რას ნიშნავს მე არ ვიცი, იმიტომ, რომ ასეთი რამ ბუნებაში არ არსებობს და ეს ქალბატონი არის ქართული პროვინციალიზმის და ფრანგული აროგანტულობის იმისთანა ჯოჯოხეთური კოქტეილი, რომ ჩვენს საგარეო პოლიტიკას კი არა, ჩვენს რეპუტაციას მოსპობს მაგის გამოჩენა საერთაშორისო არენაზე“, განაცხადა გრიგოლ ვაშაძემ.