ონის მუნიციპალიტეტის მერი ემზარ საბანაძე ზემო რაჭის მოსახლეობის ეკონომიკური კეთილდღეობისთვის ერთ-ერთ აუცილებელ პირობად ტურიზმის განვითარებას მიიჩნევს.

როგორც GUARDIAN.GE-სთან საუბრისას საბანაძემ განაცხადა, იმის მიუხედავად, რომ რაჭაში უნიკალური ბუნება, კურორტები და არაერთი ისტორიული თუ კულტურული ღირსშესანიშნაობაა, შესაბამისი ტურისტული ინფრასტრუქტურის არარსებობის გამო, ონის მუნიციპალიტეტს ბევრი, მაგრამ მხოლოდ დაბალბიუჯეტიანი ტურისტი სტუმრობს.

მერის განცხდებით, აღნიშნული მოსახლეობის კეთილდღეეობას ვერ უზრუნველყოფს, თუმცა, იმ შემთხვევაში, თუ ტურისტული ინფრასტრუქტურა მოწესრიგდება - აშენდება სასტუმროები და უკვე არსებული მოწესრიგდება, მაღალბიუჯეტიან ტურისტთა ნაკადი ეწვევა რაჭას, ეს კი, როგორც ემზარ საბანაძე ამბობს, ადგილობრივი ბიუჯეტისთვის ნაკლებმომგებიანი, თუმცა, მუნიციპალიტეტის მცხოვრებლებისთვის მნიშვნელოვანი იქნება.


„ყველამ იცის რაჭა, ყველას აინტერესებს, აქ არაჩვეულებრივი სანახაობებია, უნიკალური ბუნებაა, მაგრამ ინფრასტრუქტურა არ არის შესაბამისი. შოვში არის სასტუმროები, მაგრამ ძირითადად მოუწესრიგებელია, რამდენიმე სასტუმრო მუშაობს. უწერაში საერთოდ არ არის სასტუმრო, ახლა მიმდინარეობს სასტუმროს მშენებლობის სამუშაოები. რაც შეეხება თავად ტურისტების შემოდინებას, ძალიან ბევრი ტურისტი შემოდის, მაგრამ აქ შემოდის ისეთი ტურისტი, რომელიც დაბალბიუჯეტიანია და ასე ვთქვათ, ეკონომიკურად ჩვენთვის შედეგიანი არ არის. ტურისტი სანამ სადმე წავა, არკვევს, როგორი ინფრასტრუქტურა იმ კონკრეტულ ადგილზე. არ არის ჩვენთან ძვირიანი სასტუმროები, შემომსვლელი ტურისტები მხოლოდ მიზერულ თანხას ხარჯავენ. შეიძლება ვიღაც მთელი ერთი კვირა გაჩერდეს და ასი დოლარი არ დახარჯოს. თუმცა, როდესაც ინფრასტრუქტურაა განვითარებული, ტურისტი ჩამოვიდეს და 10 000 დოლარი დახარჯოს. აქ ასეთი ტიპის ხალხი მოდის, საოჯახო ტიპის სასტუმროებში შედიან და მცირე თანხას იხდიან.

ტურიზმი თავად მუნიციპალიტეტის ეკონომიკური განვითარებისთვის დიდად შედეგიანი არ არის, ადგილობრივ ბიუჯეტში ეს თანხა არ შემოდის, ეს მოსახლეობისთვის არის მნიშვნელოვანი. მუნიციპალიტეტს იმიტომ სჭირდება თანხა ზოგადად, რომ მოსახლეობას მოახმაროს. თუ მოსახლეობა კმაყოფილია, ძალიან კარგია”, აცხადებს ემზარ საბანაძე.